কিয় পিন্ধিব জিনছ পেণ্ট? পৰিয়ালৰ লোকৰ প্ৰহাৰত কিশোৰীৰ মৃত্যু

লক্ষ্ণৌ : পৃথিৱী ক’ৰপৰা ক’লৈ গৈ পাইছে! মহাকাশলৈ উৰা মৰা আমাৰ নাৰীয়ে সকলোকে গৰ্বিত কৰি তুলিছে। তাৰ পাছতো একাংশ লোকৰ ৰক্ষণশীলতাই সমাজখনক আজিও একপ্ৰকাৰ চেপি-খুন্দি নিঃশেষ কৰাৰ উপক্ৰম কৰি আহিছে। এইবাৰ অপৰাধৰ ৰম্যভূমি উত্তৰ প্ৰদেশত সংঘটিত হৈছে আন এক চাঞ্চল্যকৰ ঘটনা। এগৰাকী ১৭ বছৰীয়া কিশোৰীৰ মৃতদেহ এখন দলঙত ওলমি থকাৰ দৃশ্য দৃষ্টিগোচৰ হোৱাৰ পাছত সৃষ্টি হৈছে চাঞ্চল্যৰ। ৰাজ্যখনৰ দেৱৰীয়া জিলাত এই ঘটনা সংঘটিত হৈছে।

সোমবাৰে বিয়লি বা মঙলবাৰে নিশাৰ ভাগত সংঘটিত এই ঘটনাৰ কথা পলমকৈ পোহৰলৈ আহে। অভিযোগ অনুসৰি কিশোৰীগৰাকীৰ ককাক আৰু তেওঁৰ দুজন খুড়াকে তেওঁক হত্যা কৰি মৃতদেহটো দলঙখনৰ পৰা পেলাই দিয়াৰ চেষ্টা কৰিছিল। কিন্তু মৃতদেহটো দলঙৰ ৰেলিঙত লাগি ওলমি ৰয়। আৰক্ষীয়ে কিশোৰীগৰাকীক হত্যা কৰাৰ কাৰণ সন্দৰ্ভত কোনো কথা ৰাজহুৱা কৰা নাই যদিও তেওঁৰ এগৰাকী খুৰীয়েকে প্ৰকাশ কৰিছে যে, কিশোৰীগৰাকীৰ লাইফষ্টাইলক লৈ তেওঁৰ খুড়াক আৰু পৰিয়ালৰ আন সদস্যসকলৰ আপত্তি আছিল।

কিশোৰীগৰাকীৰ মাকে কৰা অভিযোগ অনুসৰি কিশোৰীগৰকীয়ে জিনছ পেণ্ট পৰিধান কৰা বাবেই অতি নিৰ্মমভাৱে তাইক মাৰ-ধৰ কৰিছিল খুৰাক আৰু ককাকে। অতি বেয়াকৈ আঘাতপ্ৰাপ্ত হৈ পৰা কিশোৰীগৰাকীক পাছত হাস্পতাললৈ লৈ যাওঁ বুলি তেওঁলোকে ঘৰৰ পৰা লৈ যায় আৰু পাছত দলঙৰ পৰা পেলাই দিয়ে। কিশোৰীগৰাকীৰ পিতৃ পঞ্জাৱত কৰ্মৰত এজন প্ৰব্ৰজিত শ্ৰমিক। এই ঘটনাই আমাৰ সমাজৰ একাংশ লোকৰ ৰক্ষণশীল চৰিত্ৰ তথা বিপদজনক মানসিকতা আজিও চিন্তাৰ কাৰণ হৈ ৰৈছে।