ডিজিটেল ডেস্কঃ এজন চিকিৎসকৰ আত্মহত্যা। মানসিক অশান্তি সহিব নোৱাৰি চিকিৎসকগৰাকীয়ে নিজৰ ক্লিনিকতে চিপ লৈ আত্মহত্যা কৰে। চিকিৎসকগৰাকীৰ মৃতদেহ তেওঁৰ ক্লিনিকত ওলমি থকা অৱস্থাত উদ্ধাৰ কৰে আৰক্ষীয়ে।
আৰক্ষীয়ে ঘটনাস্থলীত উপস্থিত হৈ মৃতদেহটো ফান্দৰ পৰা নমাই মৰণোত্তৰ পৰীক্ষাৰ বাবে প্ৰেৰণ কৰে। ক্লিনিকৰ পৰা তেওঁৰ ছুইচাইড নোট উদ্ধাৰ কৰিছে আৰক্ষীয়ে। এই ছুইচাইড নোটত চিকিৎসকে তেওঁৰ মৃত্যুৰ বাবে পত্নী আৰু পত্নীৰ ভনীয়েক-ভায়েকক জগৰীয়া কৰিছে। চিকিৎসকৰ পিতৃয়ে বৰ্তমান পত্নী, ভনীয়েক আৰু ভায়েকৰ বিৰুদ্ধে এজাহাৰ দাখিল কৰিছে। ছুইচাইড নোট আৰু অভিযোগৰ ভিত্তিত আৰক্ষীয়ে তদন্ত অব্যাহত ৰাখিছে।
উত্তৰ প্ৰদেশৰ নগৰ কোটৱালি অঞ্চলৰ নিউ ইন্দিৰা নগৰ কলনীৰ বাসিন্দা ডাঃ দেৱী দয়ালে (৪০ বছৰ) নিজ ঘৰতে ক্লিনিক চলাইছিল। পৰিয়ালটোও একেলগে থাকিছিল যদিও যোৱা কেইদিনমানৰ পৰা পত্নীয়ে তেওঁক পৰিয়ালৰ পৰা আঁতৰি থাকিবলৈ হেঁচা প্ৰয়োগ কৰি আছিল। এই বিষয়টোক লৈ চিকিৎসক আৰু তেওঁৰ পত্নীৰ মাজত বহু সময়ত বিবাদ হৈছিল।
কিছুদিন পূৰ্বে চিকিৎসকজনক মৃত্যুৰ ভাবুকি দিছিল পত্নী প্ৰিয়া যাদৱ আৰু প্ৰিয়াৰ ভনীয়েক-ভায়েকে। এই কথাত ডাঃ দেৱী দয়াল অতিশয় চিন্তিত হৈ পৰিল। পত্নীৰ হাৰাশাস্তিত অশান্ত হৈ আত্মহত্যাৰ সিদ্ধান্ত গ্ৰহণ কৰি নিজৰ ক্লিনিকত নিশা চিপ লগাই আত্মহত্যা কৰে ডাঃ দেৱী দয়ালে। পুৱা যেতিয়া তেওঁৰ মৃতদেহ ক্লিনিকত ওলমি থকা অৱস্থাত উদ্ধাৰ হয় তেতিয়া স্থানীয় অঞ্চলটোত হাহাকাৰৰ সৃষ্টি হয়।
মৃতকৰ পিতৃ শ্যামনাথ যাদৱে ডাঃ দেৱী দয়ালৰ পত্নী আৰু পত্নীৰ ভাতৃ-ভগ্নীৰ বিৰুদ্ধে এজাহাৰ দাখিল কৰিছে। এই ঘটনাৰ তদন্ত অব্যাহত ৰাখিছে আৰক্ষীয়ে।
Continue Reading
