ডিজিটেল ডেস্কঃ বজাৰত চাহিদা অনুযায়ী বৃদ্ধি পাইছে বিলাহীৰ যোগান৷ এসময়ত প্ৰতি কেজি প্ৰায় ৩০০ টকাকৈ বিক্ৰী হোৱা বিলাহীৰ দাম এতিয়া স্বাভাৱিক হৈ পৰিছে। দেশৰ সাধাৰণ মানুহে প্ৰতি কেজিত ৩০ৰ পৰা ৪০ টকা দৰত বিলাহী লাভ কৰিছে যদিও কৃষকৰ মাজত হাহাকাৰ লাগিছে। পানীৰ দামত বিলাহী বিক্ৰী কৰিবলৈ বাধ্য হৈছে কৃষকসকল৷
মহাৰাষ্ট্ৰৰ লাটুৰৰ কৃষকৰ অৱস্থা এনেকুৱা যে তেওঁলোকে নিজৰ শস্য প্ৰতি কেজিত মাত্ৰ ৮০ পইচাত বিক্ৰী কৰিব লগা হৈছে। পাইকাৰী বজাৰত ইয়াৰ দাম তীব্ৰভাৱে হ্ৰাস পাইছে, যাৰ বাবে কৃষকসকলে বিলাহী শস্যৰ খেতিৰ খৰচ আদায় কৰিবলৈ সক্ষম হোৱা নাই।
লাটুৰৰ এজন কৃষকে কয় যে তেওঁ ২ৰ পৰা ৩ হেক্টৰ মাটিত বিলাহীৰ খেতি কৰিছিল যাতে তেওঁ ভাল লাভ কৰিব পাৰে। এই শস্য প্ৰস্তুত কৰিবলৈ ২ৰ পৰা ৩ লাখ টকা খৰচ হৈছিল, কিন্তু এতিয়া পৰিস্থিতি এনে হৈছে যে তেওঁলোকে মূলখৰচো আদায় কৰিব পৰা নাই। কৃষকসকলে ইয়াৰ বিৰুদ্ধে আপত্তি কৰি ৰাজপথত বিলাহী দলিয়াই প্ৰতিবাদ সাব্যস্ত কৰিছে। ইয়াৰ বাবে সঠিক মূল্য নিৰ্ধাৰণ কৰিবলৈ চৰকাৰক আহ্বান জনাইছে কৃষকসকলে।
উল্লেখযোগ্য যে মাত্ৰ কেইদিনমানৰ আগতে বিলাহীৰ দাম আকাশলংঘী আছিল। ধাৰাসাৰ বৰষুণ আৰু যোগানৰ অভাৱৰ বাবে দেশত বিলাহীৰ দাম প্ৰায় ২০০ টকাৰ পৰা ৩০০ টকা পৰ্যন্ত বৃদ্ধি হৈছিল। এনে পৰিস্থিতিত বৃহৎ লাভৰ বাবে প্ৰায়বোৰ ঠাইতে বিলাহী খেতি আৰম্ভ হ’ল, যাৰ ফলত উৎপাদনত প্ৰভাৱ পৰিল। অধিক উৎপাদনৰ বাবে বিলাহীৰ যোগান বৃদ্ধি পালে। যোগান শৃংখল পুনৰ আৰম্ভ হোৱাৰ লগে লগে বৃহৎ পৰিমাণৰ বিলাহী বজাৰত প্ৰৱেশ কৰিবলৈ আৰম্ভ কৰে।
Continue Reading
