ডিজিটেল ডেস্কঃ কৰমণ্ডল এক্সপ্ৰেছ দুৰ্ঘটনাত মৃতকৰ সংখ্যা ২৭৮ গৰাকীলৈ বৃদ্ধি পাইছে।আজি পুনৰ তিনি জন আহত লোকৰ মৃত্যু ঘটে। এতিয়াও চিনাক্তকৰণ নোহোৱাকৈ পৰি ৰৈছে ১০১ টা মৃতদেহ। ভুৱনেশ্বৰৰ মৰ্গত ৰখা বহু কেইটা মৃতদেহ কোনো লোকেই চিনাক্ত কৰিবলৈ সক্ষম হোৱা নাই।
শুকুৰবাৰে কৰমণ্ডল এক্সপ্ৰেছ দুৰ্ঘটনাত ২৭৫ গৰাকী যাত্ৰী নিহত হোৱা বুলি প্ৰথমে চৰকাৰীভাবে প্ৰকাশ কৰা হৈছিল। এতিয়া সেই সংখ্যা বৃদ্ধি পাই ২৭৮ গৰাকী হৈছে। ইষ্টাৰ্ণ ৰে'লৱেৰ বিভাগীয় ৰে'ল ৱে মেনেজাৰ ৰিঙ্কেশ ৰয়ে কয়, "দুৰ্ঘটনাটোত ১,১০০ জন লোক আহত হৈছে। তাৰে ভিতৰত ৯০০ লোকক চিকিৎসালয়ৰ পৰা অব্যাহতি দিয়া হৈছে।
ৰাজ্যখনৰ বিভিন্ন চিকিৎসালয়ত এতিয়াও ২০০ ৰো অধিক লোক চিকিৎসাধীন হৈ আছে। দুৰ্ঘটনাটোত মুঠ মৃত্যুৰ সংখ্যা ২৭৮ গৰাকী হৈছে। কিন্তু তেওঁলোকৰ ১০১ জনৰ মৃতদেহ চিনাক্ত কৰিব পৰা হোৱা নাই। "
মৃতদেহবোৰ ভুৱনেশ্বৰৰ শৱগৃহত এখন পৰ্দাত দেখুওৱা হৈছে। কিন্তু আত্মীয়সকলৰ মতে এনেদৰে মৃতদেহ চিনাক্ত কৰিব পৰা সম্ভৱ নহয়। দুৰ্ঘটনাটোৰ ফলস্বৰূপে বহু মৃতদেহ বিকৃত হৈ পৰিছে । সেয়েহে সেইবোৰ চিনাক্ত কৰাত কঠিন হৈ পৰিছে। পৰিয়ালৰ সদস্যসকলে প্ৰিয়জনক হেৰুওৱাৰ দুখৰ মাজত তেওঁলোকৰ মৃতদেহ বিচাৰি বলৈ প্ৰাণপণে চেষ্টা কৰি আছে।
Continue Reading
