ডিজিটেল ডেস্কঃকৰ্ণাটকত সংঘটিত হৈছে এক মৰ্মান্তিক ঘটনা। স্কুলৰ পৰা উভতি অহাৰ পথতে স্কুল বাছৰ পৰা চিটিকি পৰি এটি শিশুৰ কৰুণ মৃত্যু ঘটে। দ্ৰুত গতিত চলি থকা স্কুল বাছখনৰ দুৱাৰখন খুলি যোৱাত শিশুটি বাহিৰলৈ ওলাই পৰে। শিশুটিয়ে বাছখনৰ পিছফালৰ চকাত পিষ্ট হৈ মত্যুক সাৱটি লয়।
ঘটনাটো কৰ্ণাটকৰ ৰামনগৰ জিলাৰ কনকপুৰা অঞ্চলত সংঘটিত হৈছে। মৃত শিশুটি শ্ৰী চাই ইণ্টাৰনেচনেল স্কুলৰ ছাত্ৰী আছিল। ৪ বছৰীয়া শিশুটো বাছখনৰ দুৱাৰৰ ঠিক সন্মুখত বহি আছিল। অভিযোগ কৰা হৈছে যে চালকজনে বাছখনৰ দুৱাৰ বন্ধ কৰিবলৈ পাহৰি গৈছিল। তেওঁৰ সহায়কেও দুৱাৰখন বন্ধ কৰা নাছিল। কোনেও শিশুটোক দুৱাৰৰ সন্মুখৰ পৰা ওলাই ভিতৰলৈ বহিবলৈ পৰামৰ্শ দিয়া নাছিল।
শিশুটোৰ পিতৃয়ে আৰক্ষীৰ ওচৰত দাখিল কৰা অভিযোগ অনুসৰি বাছখনে দ্ৰুত গতিত ধুমুহাৰ দৰে আগবাঢ়িছিল। মূৰত আঘাত পোৱাৰ ফলতে শিশুটিয়ে ঘটনাস্থলীতে মৃত্যুবৰণ কৰে। শিশুটোৰ পিতৃয়ে প্ৰকাশ কৰা মতে চালক আৰু বাছ সহায়কজন অলপ সতৰ্ক হ'লেই দুৰ্ঘটনাটো এৰাই চলিব পাৰিলেহেঁতেন। শিশুটিৰ পিতৃয়ে চালক আৰু সহায়কৰ বিৰুদ্ধে অভিযোগ দাখিল কৰিছে। আৰক্ষীয়ে অভিযুক্ত দুজনক বিচাৰি আছে। দুৰ্ঘটনাটোৰ পিছতে তেওঁলোকে বাছখন এৰি ঘটনাস্থলীৰ পৰা পলাই গৈছিল।
Continue Reading
