কংগ্ৰেছৰ নৱ নিৰ্বাচিত সভাপতি মল্লিকাৰ্জুন খৰ্গেক কি ক’লে প্ৰতিদ্বন্দি শশী থাৰুৰে?

ডিজিটেল ডেস্কঃ কংগ্ৰেছৰ নৱনিৰ্বাচিত সভাপতি মল্লিকাৰ্জুন খৰ্গেক শুভেচ্ছা জ্ঞাপন কৰিছে জ্যেষ্ঠ কংগ্ৰেছ নেতা শশী থাৰুৰে। টুইটাৰযোগে থাৰুৰে লিখে যে খৰ্গেৰ নেতৃত্বত দলটো পুনৰ উজ্জীৱিত হৈ পৰিব।

থাৰুৰে লিখে যে দলৰ সকলো নেতাই একেলগে কাম কৰি দলটোক এটা উচ্চ পৰ্যায়লৈ নিব লাগিব। বিদায়ী সভাপতি ছোনিয়া গান্ধীকো তেওঁ দললৈ আগবঢ়োৱা বৰঙনিৰ বাবে ধন্যবাদ জ্ঞাপন কৰে।

উল্লেখ্য যে বহুচৰ্চিত কংগ্ৰেছৰ সভাপতি নিৰ্বাচনত শশী থাৰুৰ আৰু মল্লিকাৰ্জুন খৰ্গেই প্ৰতিদ্বন্দিতা কৰিছিল। আজি ঘোষিত হোৱা ফলাফলত খৰ্গেই বৃহৎ ব্যৱধানত বিজয়সাব্যষ্ট কৰে।

ফলাফল ঘোষণা হোৱাৰ পাছতে এখন বিজ্ঞপ্তীৰ জৰিয়তে থাৰুৰে খৰ্গেক অভিবাদন জনায় আৰু সভাপতি নিৰ্বাচনত তেওঁক সহযোগ কৰা সকলো দলীয় কৰ্মীলৈ ধন্যবাদ জ্ঞাপন কৰে।

“আমাৰ প্ৰতিদ্বন্দিতাৰ ফলত কংগ্ৰেছ দলটো শক্তিশালী হৈছে।”- টুইটাৰযোগে থাৰুৰে কয়। ছোনিয়া গান্ধীৰ উপৰিও তেওঁ ৰাহুল গান্ধী আৰু প্ৰিয়ংকা গান্ধীকো এটা নিকা নিৰ্বাচন অনুষ্ঠিত কৰাৰ বাবে ধন্যবাদ জনায়।

থাৰুৰে কয় যে নেহৰু-গান্ধী পৰিয়ালে সদায় কংগ্ৰেছৰ সদস্যসকলৰ মাজত সুকীয়া স্থান দখল কৰি থাকিব।