ডিজিটেল ডেস্কঃ নিজে জন্ম দিয়া চাৰিটা সন্তানৰ বাবে কংগ্ৰেছক দোষাৰোপ কৰিলে জনপ্ৰিয় ভোজপুৰী তাৰকা তথা বিজেপি সাংসদ ৰবি কিছাণে। এখন আলোচনাচক্ৰত জনসংখ্যা নিয়ন্ত্ৰণৰ বিলক সমৰ্থন কৰি ৰবিয়ে এই সম্পৰ্কে আমোদজনক ভাষ্য প্ৰদান কৰে।
ৰবিয়ে কয় যে কংগ্ৰেছ চৰকাৰে জনসংখ্যা নিয়ন্ত্ৰণ বিল আইনত পৰিণত কৰা হ’লে তেওঁ চাৰিটাকৈ সন্তান জন্ম দিয়াৰ পৰা বিৰত থাকিলেহেঁতেন।
উল্লেখ্য যে ৰবি কিছানক ভোজপুৰী চিনেমাৰ চুপাৰষ্টাৰ হিচাপে জনা যায়। একাধিক বলিউডৰ ছৱিতো অভিনয় কৰিছে ৰবিয়ে। অভিনয়ৰ উপৰিও বিজেপিৰ হৈ উত্তৰপ্ৰদেশৰ গোৰখপুৰ সমষ্টিৰ পৰা নিৰ্বাচন খেলি সাংসদ হৈছে ৰবি।
এটা সংবাদমাধ্যমৰ আলোচনাচক্ৰত ৰবিক জনসংখ্যা নিয়ন্ত্ৰণ বিলৰ বিষয়ে সোধা হৈছিল। উত্তৰত ৰবিয়ে কয় যে সন্তান জন্ম দি তেওঁৰ পত্নীয়ে ব্যাপক শাৰীৰিক সমস্যাত ভুগি আহিছে। এইটো ৰবিৰ বাবে অত্যন্ত বেদনাদায়ক।
“কংগ্ৰেছে জনসংখ্যা নিয়ন্ত্ৰণ বিল অনা হ’লে মই এই কাম নকৰিলোহেঁতেন।”- ৰবিয়ে কয়। অভিনেতাগৰাকীৰ এই মন্তব্যৰ পাছতে হাস্যৰসৰ জোৱাৰ উঠে। সম্প্ৰতি সামাজিক মাধ্যমতো ৰবিৰ মন্তব্যৰ ভিডিঅ’টো ভাইৰেল হৈ পৰিছে।
Continue Reading
