ডিজিটেল ডেস্কঃ লোকসভা নিৰ্বাচনৰ পূৰ্বে শলঠেকত পৰিছে কংগ্ৰেছ। আয়কৰ বিভাগে দেশৰ প্ৰাচীন ৰাজনৈতিক দলটোক ১,৭০০ কোটি টকাৰ জৰিমনা বিহিছে। আয়কৰ বিভাগে কংগ্ৰেছক এই সন্দৰ্ভত ইতিমধ্যে জাননী জাৰি কৰিছে। বৃহস্পতিবাৰে, দিল্লী উচ্চ ন্যায়ালয়ে কংগ্ৰেছে দাখিল কৰা চাৰিখন আবেদন খাৰিজ কৰিছিল।
আয়কৰ বিভাগে ২০১৭ চনৰ পৰা ২০২১ চনলৈ চাৰিটা বিত্তীয়বৰ্ষৰ বাবে কংগ্ৰেছৰ আয়কৰ ৰিটাৰ্ণ পুনৰ মূল্যাঙ্কন কৰাৰ সিদ্ধান্ত লৈছে। সেই সিদ্ধান্তক কংগ্ৰেছে প্ৰত্যাহ্বান জনাই আদালতৰ কাষ চাপিছিল। কিন্তু আদালতে কংগ্ৰেছৰ আবেদন নাকচ কৰাৰ পিছত ধাৰণা কৰা অনুসৰি হাত শিবিৰে আয়কৰৰ বকেয়া হিচাপে কমেও ৫০০ কোটি টকা পৰিশোধ কৰিব লাগিব পাৰে।
আয়কৰ বিভাগৰ জাননীখনত উল্লেখ কৰা হৈছে যে ২০১৭-১৮ বৰ্ষৰ পৰা ২০২০-২১ বৰ্ষলৈ চাৰিটা বিত্তীয়বৰ্ষৰ বাবে কংগ্ৰেছৰ আয়কৰ ৰিটাৰ্ণৰ আধাৰত জাননীখন জাৰি কৰা হৈছে। ইয়াত জৰিমনা আৰু সূত সকলো সামৰি লোৱা হৈছে। ১৬ ফেব্ৰুৱাৰীত আয়কৰ বিভাগে আয়কৰ প্ৰণালীত অনিয়মৰ অভিযোগত কংগ্ৰেছৰ সভাপতিৰ বেংক একাউণ্ট ফ্ৰীজ কৰিছিল।
২১ ফেব্ৰুৱাৰীত কংগ্ৰেছৰ কোষাধ্যক্ষ অজয় মাকনে অভিযোগ কৰিছিল যে আয়কৰ বিভাগে (আইটি) দলটোৰ বেংক একাউণ্টৰ পৰা জৰিমনা হিচাপে অবৈধভাৱে ৬৫ কোটি টকা কৰ্তন কৰিছে। কংগ্ৰেছে লগতে অভিযোগ কৰিছে যে আয়কৰ বিবাদ প্ৰকৃততে মোদী চৰকাৰৰ ৰাজনৈতিক প্ৰতিশোধ। ইয়াৰ আঁৰৰ মূল উদ্দেশ্য হৈছে গণতান্ত্ৰিক অধিকাৰ কাঢ়ি লোৱা।
Continue Reading
