ডিজিটেল ডেস্কঃ বিৰাট কোহলী আৰু অনুষ্কা শৰ্মাৰ কন্যাক ধৰ্ষণ কৰাৰ ভাবুকি দিয়া অভিযন্তাৰ বিৰুদ্ধে দাখিল কৰা এফআইআৰ খাৰিজ কৰিছে ন্যায়ালয়ে। বম্বে উচ্চ ন্যায়ালয়ৰ ন্যায়াধীশ গাডকাৰী আৰু ন্যায়াধীশ পি ডি নাইকৰ বিচাৰপীঠে ১০ এপ্ৰিল সোমবাৰে এই সিদ্ধান্ত প্ৰদান কৰে৷এই গোচৰত অভিযোগকাৰীয়ে আদালতত সন্মতি শপতনামা দিছিল, য’ত অভিযুক্ত ৰামনাগেশ শ্ৰীনিবাস আকুবাথিনীৰ বিৰুদ্ধে গোচৰ চলাব নালাগে বুলি কোৱা হৈছিল।
এই গোচৰৰ অভিযোগকাৰী আছিল বিৰাট-অনুষ্কাৰ মেনেজাৰ। ইয়াৰ উপৰিও অভিযুক্তই আদালতত কয় যে তেওঁ এজন মেধাৱী আইআইটি-জেইই ৰেংক হোল্ডাৰ আছিল আৰু এই গোচৰে তেওঁৰ ভৱিষ্যতৰ সম্ভাৱনাৰ ক্ষতি কৰিব। এই যুক্তিৰ পিছত আদালতে এফআইআৰ আৰু অভিযোগনামা খাৰিজ কৰে।
এই গোচৰত ২০২১ চনৰ ২৭ নৱেম্বৰত মুম্বাইৰ মেট্ৰ’পলিটান ক’ৰ্টে আকুবাথিনীক জামিন মঞ্জুৰ কৰে। দণ্ডাধীশ কোমল সিং ৰাজপুতে কয় যে অকুবাথিনীয়ে পোষ্ট কৰা মন্তব্য আৰু তাত ব্যৱহৃত শব্দৰ প্ৰতি লক্ষ্য ৰাখি ক্ৰিকেটাৰগৰাকী বা তেওঁৰ পৰিয়ালৰ বিষয়ে পোনপটীয়াকৈ লিখা হোৱা নাই।
তেওঁ আৰু কৈছিল যে ৰামনাগেশ আকুবাথিনিৰ বিৰুদ্ধে উত্থাপিত অভিযোগৰ বেছিভাগেই জামিনযোগ্য, আৰু কেৱল এই গোচৰটো ভাৰতীয় ক্ৰিকেট দলৰ এজন সন্মানীয় সদস্যৰ সৈতে জড়িত হোৱাৰ বাবেই তেওঁৰ জামিন বাতিল কৰিব পৰা নাযায়।
Continue Reading
