ডিজিটেল ডেস্কঃ চীন আৰু পাকিস্তানৰ ভাবুকি চম্ভালিবলৈ ভাৰতে ইউক্ৰেইনৰ পৰা শিক্ষা লোৱা উচিত। এই পৰামৰ্শ আগবঢ়াইছে ইউক্ৰেইনৰ জেলেনস্কি চৰকাৰৰ বৈদেশিক পৰিক্ৰমা উপ-মন্ত্ৰী ইমিন জাপাৰ’ভাই। ভাৰতক ইউক্ৰেইনৰ আদৰ্শ ল’বলৈ তেওঁ পৰামৰ্শ দিয়ে।
মঙলবাৰে নতুন দিল্লীত অনুষ্ঠিত ‘ইণ্ডিয়ান কাউন্সিল অৱ ৱৰ্ল্ড এফেয়াৰ্ছ’ (আই চি ডব্লিউ এ)ৰ বৈঠকত তেওঁ কয় যে, ভাৰতে কঠিন চুবুৰীয়া দেশৰ সৈতে কেনেদৰে মোকাবিলা কৰিব লাগে, সেই বিষয়ে ইউক্ৰেইনৰ ক্ৰিমিয়াৰ পৰিস্থিতিৰ পৰা শিকিব পাৰে।
৪ দিনীয়া ভাৰত ভ্ৰমণৰ বাবে দেওবাৰে নতুন দিল্লীত উপস্থিত হয় এমিন। যোৱা বছৰৰ ২৪ ফেব্ৰুৱাৰীত ৰাছিয়া সেনাৰ আক্ৰমণ আৰম্ভ হোৱাৰ পিছত এইবাৰ প্ৰথমবাৰৰ বাবে ইউক্ৰেইনৰ মন্ত্ৰী ভাৰত ভ্ৰমণ কৰিছে।
তাৎপৰ্যপূৰ্ণভাৱে ৰাষ্ট্ৰসংঘত ইউক্ৰেইন যুদ্ধক লৈ আমেৰিকা আৰু ইউৰোপীয় দেশসমূহে ৰাছিয়াৰ বিৰুদ্ধে অনা কোনো প্ৰস্তাৱক নতুন দিল্লীয়ে এতিয়াও সমৰ্থন কৰা নাই। ইমিনৰ মতে এই পৰিস্থিতিত এনেধৰণৰ ‘দায়বদ্ধতা পৰিহাৰ’ কৌশল বিশেষভাৱে উপযোগী নহয়। চীন আৰু পাকিস্তানৰ দৰে কঠোৰ প্ৰতিবেশী দেশৰ সৈতে যদি সঠিকভাৱে মোকাবিলা কৰা নহয় তেন্তে সমস্যাটো আৰু ডাঙৰ হ’ব পাৰে বুলিও তেওঁ কয়।
একাংশ কূটনৈতিক মহলৰ মতে ইমিনৰ এই মন্তব্যত লাডাখৰ ভাৰত-চীন সংঘাত আৰু পাকিস্তান সীমান্তৰ পৰিস্থিতিৰ কথা উল্লেখ কৰা হৈছে। মস্কো আৰু নতুন দিল্লীৰ পুৰণি বন্ধুত্বক মনত ৰাখি ইউক্ৰেইনে ভাৰতৰ সৈতে বন্ধুত্ব বিচাৰে বুলিও জেলেনস্কিৰ মন্ত্ৰীগৰাকীয়ে কয়।
তেওঁ কয়, ‘মই এটা বাৰ্তা লৈ ভাৰতলৈ আহিছো। ইউক্ৰেইনে সঁচাকৈয়ে বিচাৰে ভাৰত আৰু ইউক্ৰেইন আৰু অধিক ঘনিষ্ঠ হওক। আমি ভাৰতৰ সৈতে নতুন সম্পৰ্ক আৰম্ভ কৰিব বিচাৰো।”
Continue Reading
