ডিজিটেল ডেস্কঃ কোভিডৰ সময়ত কাৰাগাৰত বন্দীৰ সংখ্যা কম কৰি ভাইৰাছৰ বিস্তাৰ নিয়ন্ত্ৰণ কৰিব বিচৰা হৈছিল। সেইমৰ্মে বহু বন্দীক কাৰাগাৰৰ পৰা মুক্তি দিয়া হৈছিল। কোভিড পৰিস্থিতি উন্নত হোৱাৰ পিছত এতিয়া সেইসকল মুক্তি পোৱা বন্দীক আত্মসমৰ্পণ কৰিবলৈ নিৰ্দেশ দিয়া হৈছে।
উচ্চতম ন্যায়ালয়ে কোভিড-১৯ৰ বাবে চৰ্তসাপেক্ষে মুকলি কৰি দিয়া দোষী আৰু বিচাৰাধীন বন্দীসকলক কাৰাগাৰলৈ উভতি যাবলৈ নিৰ্দেশ দিছে। শুক্ৰবাৰে দেশৰ শীৰ্ষ আদালত খনে এই নিৰ্দেশ জাৰি কৰে।
বহুতো দোষী সাব্যস্ত আৰু বিচাৰাধীন বন্দীক কোভিড পৰিস্থিতিত ভাইৰাছৰ বিস্তাৰৰ পৰা সুৰক্ষিত কৰিবলৈ মুক্তি দিয়া হৈছিল। দেশত কোভিডৰ সংক্ৰমণৰ আঢ়ৈ বছৰৰ পিছত পৰিস্থিতি এতিয়া প্ৰায় স্বাভাৱিক হৈ পৰিছে। সেয়ে উচ্চতম ন্যায়ালয়ে মুক্তি প্ৰাপ্ত বন্দীসকলে পুনৰ আত্মসমৰ্পণ কৰিব লাগিব বুলি নিৰ্দেশ দিছে। এই বন্দীসকলক পৰৱৰ্তী ১৫ দিনৰ ভিতৰত আত্মসমৰ্পণ কৰিবলৈ নিৰ্দেশ দিয়া হৈছে।
ন্যায়াধীশ এম আৰ শ্বাহ আৰু চি টি ৰবিকুমাৰৰ বিচাৰপীঠে নিৰ্দেশ দিছে যে কোভিদ মহামাৰীৰ সময়ত জৰুৰীকালীন ভিত্তিত জামিনত মুকলি হোৱা বিচাৰাধীন বন্দীসকলে আত্মসমৰ্পণ কৰিব লাগিব। আত্মসমৰ্পণ কৰাৰ পিছত তেওঁলোকে পুনৰ আদালতলৈ যাব পাৰিব আৰু জামিনৰ বাবে আবেদন কৰিব পাৰিব।
উল্লেখ্য কোভিড পৰিৱেশত মুকলি কৰি দিয়া বেছিভাগ দোষী সাব্যস্ত আৰু বিচাৰাধীন বন্দী গুৰুতৰ অপৰাধত অভিযুক্ত নাছিল। উচ্চতযম ন্যায়ালয়ৰ নিৰ্দেশ অনুসৰি বিভিন্ন সমিতিৰ পৰামৰ্শৰ ভিত্তিত বন্দীসকলক বিভিন্ন ৰাজ্যৰ কাৰাগাৰৰ পৰা মুকলি কৰি দিয়া হৈছিল।
Continue Reading
