ডিজিটেল ডেস্কঃ কোভিড ভেকচিনৰ বাবে মহিলাসকলৰ মাহেকীয়া চক্ৰতো সমস্যাই দেখা দিবলৈ ধৰিছে। এইমছৰ গৱেষণাত এই ভয়ংকৰ তথ্য পোহৰলৈ আহিছে।
এই গৱেষণাই দাবী কৰিছে যে কোভিড ভেকচিনৰ পাছত প্ৰায় ৬ শতাংশ মহিলাৰ ঋতুচক্ৰ প্ৰভাৱিত হৈছে। এই গৱেষণা দেশৰ ছখন এইমছত কৰা হৈছিল, য’ত ৫৭০৯ গৰাকী মহিলাৰ ওপৰত অধ্যয়ন কৰা হৈছিল।
গৱেষণাৰ মতে এই মহিলাসকলৰ ভিতৰত ৭৮.২% মহিলাই কভিশ্বিল্ডৰ দুটা ড’জ আৰু ২১.৮% মহিলাই ক’ভাক্সিনৰ দুটা ড’জ গ্ৰহণ কৰিছিল। এইমছ গোৰখপুৰৰ শৰীৰবিজ্ঞান বিভাগৰ ডাঃ চাৰুশিলা ৰুকাডিকাৰে কয় যে, যিসকল মহিলাৰ ঋতুচক্ৰ ২৮ৰ পৰা ৩৮ দিনৰ ব্যৱধানত আহে, এনে মহিলাক অধ্যয়নৰ বাবে বাছনি কৰা হৈছিল।
ঋতুচক্ৰত কি কি পৰিৱৰ্তন ঘটিছিল?
গৱেষণাৰ মতে, টিকাকৰণৰ পিছত ৩৩৩ গৰাকী মহিলাৰ ঋতুচক্ৰ অনিয়মিত হৈ পৰে। ৩০১ গৰাকী মহিলাৰ ৰক্তক্ষৰণৰ পৰিমাণৰ পৰিৱৰ্তন ঘটিছিল। একে সময়তে ৭২১ গৰাকী মহিলাৰ ঋতুচক্ৰৰ সময়ত নতুন লক্ষণ দেখা দিছিল, যেনে- দুৰ্বলতা, মূৰৰ বিষ, শৰীৰৰ বিষ। ৰক্তক্ষৰণৰ পৰিমাণ প্ৰায় ৫১ শতাংশ বৃদ্ধি পোৱাৰ বিপৰীতে ৪৮ শতাংশ হ্ৰাস পাইছে।
চিকিৎসকে কি কয়?
কোভিড ভেকচিনৰ পাৰ্শ্বক্ৰিয়াৰ ওপৰত অধ্যয়ন কৰা ডাঃ চাৰুশিলা ৰুকাডিকাৰে কয় যে এই পৰিৱৰ্তন সাময়িক। এনে পৰিস্থিতিত ভেকচিন লোৱাৰ কিছু সময়ৰ পিছত ঋতুচক্ৰ স্বাভাৱিক হৈ পৰে।
বিশ্ব স্বাস্থ্য সংস্থাইও মানি লৈছিল
বিশ্ব স্বাস্থ্য সংস্থাইও এই ভেকচিনৰ পাৰ্শ্বক্ৰিয়া বুলি মানি লৈছে। ডাঃ চাৰুশিলাই কয় যে এতিয়া ভেকচিনৰ পাৰ্শ্বক্ৰিয়াৰ মূল্যায়নৰ বাবে শীঘ্ৰে দ্বিতীয় পৰ্যায়ৰ গৱেষণা আৰম্ভ কৰা হ’ব।
