ডিজিটেল ডেস্ক: শেহতীয়াকৈ সংবাদ শিৰোনামত আছে ‘দ্য গ্ৰেট ইণ্ডিয়ান কপিল শ্ব’৷ কপিল শৰ্মা আৰু সুনীল গ্ৰোভাৰে এই অনুষ্ঠানটোৰ জৰিয়তে দীৰ্ঘবিৰতিৰ অন্তত একেলগে অভিনয় কৰিবলৈ গৈ আছে।
অনুৰাগীসকলে দুয়োগৰাকী অভিনেতাকে পুনৰ একেলগে চাবলৈ আগ্ৰহেৰে অপেক্ষা কৰি আছে। কপিলৰ অনুষ্ঠানটো ৩০ মাৰ্চৰ পৰা ‘নেটফ্লিক্স’ত প্ৰদৰ্শিত হ'ব। ‘দ্য গ্ৰেট ইণ্ডিয়ান কপিল শ্ব’ত কিকু শাৰদা, ৰাজীৱ ঠাকুৰ, ক্ৰুষ্ণা অভিষেক আৰু অৰ্চনা পুৰাণ সিঙৰ লগতে কপিল শৰ্মা আৰু সুনীল গ্ৰোভাৰেও অভিনয় কৰিব। কিন্তু যোৱা ছিজনত কপিলৰ শ্ব’ৰ অংশ হোৱা ভাৰতী সিং এই নতুন ছিজনৰ অংশ নহ'ব। শেহতীয়াকৈ, ভাৰতী সিঙে ব্যাখ্যা কৰিছে ইয়াৰ আঁৰৰ কাৰণ৷
‘ইটাইমছ’ৰ সৈতে হোৱা বাৰ্তালাপত ভাৰতী সিঙে কয়, মই এতিয়া কপিল শৰ্মাৰ অনুষ্ঠানৰ অংশ নহয়। কিন্তু ভৱিষ্যতে যদি মই এই অনুষ্ঠানটোৰ সৈতে সম্পৰ্কিত কিছুমান আকৰ্ষণীয় প্ৰস্তাৱ পাওঁ, তেন্তে মই নিশ্চিতভাৱে ইয়াৰ বিষয়ে চিন্তা কৰিম। কিন্তু এই মুহূৰ্তত মই মোৰ অনুষ্ঠান ডান্স দিৱানেত ব্যস্ত, তাৰ বাহিৰেও হৰ্ষ আৰু মই আমাৰ পডকাষ্টতো কাম কৰি আছোঁ।
ভাৰতী সিং আৰু কপিল শৰ্মাই একেলগে কাম কৰক বা নকৰক, তেওঁলোক দুয়োজনে ইজনে-সিজনক তেওঁলোকৰ পৰিয়াল বুলি গণ্য কৰে। কৰৱা চৌথৰ পৰা দীপাৱলীলৈকে, প্ৰতিটো উৎসৱ ভাৰতী সিং আৰু কপিলৰ পৰিয়ালে একেলগে উদযাপন কৰে। এইকাৰণেই কেইবছৰমান পূৰ্বে ভাৰতী সিং আৰু কপিল শৰ্মাৰ সম্পৰ্কৰ মাজৰ বিভেদৰ বাতৰিৰ বিষয়ে কওঁতে কপিলে কৈছিল যে তেওঁ তেওঁৰ বন্ধুবৰ্গৰ সৈতে প্ৰতিটো প্ৰজেক্টতে কাম কৰাৰ প্ৰয়োজন নাই, কিন্তু ইয়াৰ অৰ্থ এইটো নহয় যে তেওঁলোকৰ বন্ধুত্বৰ সমাপ্তি ঘটিছে। তেওঁ কৈছিল, আমি কাম অবিহনেও লগ হৈ থাকো। সেই সময়ত আমাৰ লগত কোনো কেমেৰা নাথাকে।
Continue Reading
