ক’ভিডৰ আন এখন ভয়াৱহ ছবি! মাত্ৰ ১৫ দিনত ৫০ শতাংশ ব্যৱসায়িক লোকচানৰ সন্মুখীন হ’ল ভাৰত

ডিজিটেল ডেস্কঃ ক’ভিড-১৯এ সমগ্ৰ বিশ্বতে এক প্ৰকাৰৰ ত্ৰাসৰ সৃষ্টি কৰিলে৷ মানুহৰ জীৱনৰ নিৰাপত্তা নোহোৱাৰ দৰে জীৱিকাৰ প্ৰতিও এক প্ৰকাৰৰ ভাবুকি আহি পৰিল৷ ক’ভিড-১৯ ৰ ভয়াৱহ সংক্ৰমণৰ পাছত বিভিন্ন দেশে অনিচ্ছা সত্ত্বেও লকডাউনৰ দৰে প্ৰদক্ষেপ গ্ৰহণ কৰিব লগা হ’ল৷ লকডাউনৰ কাৰণে ভাৰতৰ দৰে তৃতীয় বিশ্বৰ উন্নয়নশীল দেশসমূহে বৃহৎ প্ৰত্যাহ্বানৰ সন্মুখীন হ’বলগা হৈছে৷ কিয়নো তৃতীয় বিশ্বৰ দেশসমূহে কেৱল উন্নয়নৰ বাবে নিৰন্তৰভাৱে প্ৰচেষ্টা অব্যাহত ৰাখে, তেনেস্থলত লকডাউনৰ দৰে ব্যৱস্থাই অৰ্থনৈতিক গতি তৰান্বিত কৰাই নহয়, এখন দেশে অৰ্থনৈতিকভাৱে বহু পিছপৰি ৰয়৷ ২০২১ বৰ্ষটো সম্পূৰ্ণৰূপে ক’ভিডৰ বৰ্ষ আছিল বুলি ক’লেও ভুল কোৱা নহ’ব৷ কৰ’নাৰ কৰাল গ্ৰাসত পৰি বহুতে হেৰুৱালে জীৱিকাৰ পথ, আন কোনোৱে হেৰুৱালে নিজৰ আত্মীয়-স্বজনক৷ ক’ভিডৰ প্ৰথম ঢৌক যদিও ভাৰতে সমগ্ৰ পৰিস্থিতিতো নিয়ন্ত্ৰণত ৰাখিব পাৰিছিল যদিও ক’ভিডৰ দ্বিতীয় লহৰে সমগ্ৰ দেশতে বিভীষিকাৰ সৃষ্টি কৰিলে৷ এই পৰিস্থিতিত দেশৰ অৰ্থনৈতিক ক্ৰিয়াকৰ্ম স্তব্ধ হৈ পৰিছে৷ লগতে সামগ্ৰীৰ দাম বৃদ্ধি হৈছে৷ এই মহামাৰী কৱলত পৰি বিশ্বৰ সকলো দেশৰ অৰ্থনীতিৰ অৱস্থা একেবাৰে বেয়াৰ দিশলৈ গতি কৰিছে, সেয়া লাগিলে উদ্যোগিক ক্ষেত্ৰতে হওক, কৃষি খণ্ড বা আন অৰ্থনৈতিক ক্ষেত্ৰত সকলোৰে অৱস্থা নাজল-নাথল৷ শেহতীয়াকৈ, ক’ভিড-১৯-ৰ ভয়াৱহ সংক্ৰমণ বৃদ্ধি পোৱাৰ পৰিপ্ৰেক্ষিতত দেশৰ বিভিন্ন ৰাজ্যই সান্ধ্যআইনকে ধৰি বিভিন্ন নিষেধাজ্ঞ জাৰি কৰিছে৷ ক’ভিডৰ প্ৰথম আৰু দ্বিতীয় ঢৌৰ পৰা সামান্য পৰিমাণে ককাল পোনাবলৈ লোৱা ভাৰতে পুনৰ ক’ভিডৰ তৃতীয় ঢৌৰ আশংকা মাজতে ভাৰতৰ অৰ্থনৈতিক ক্ষেত্ৰই পুনৰ এক অনিশ্চিত ভৱিষ্যতৰ দিশলৈ গতি কৰিবলৈ লৈছে৷ ক’ভিডৰ বাবে ভাৰতৰ বিভিন্ন ৰাজ্যই নিষেধাজ্ঞ জাৰি কৰাৰ পাছত দেশৰ ব্যৱসায়িক খণ্ডই যথেষ্ট লোকচানৰ সন্মুখীন হৈছে৷ সৰ্বভাৰতীয় ব্যৱসায়ী সংস্থা কেইটে জনোৱা অনুসৰি বিগত পোন্ধৰ দিনত ৫০ শতাংশ ব্যৱসায়িক লোকচানৰ সন্মুখীন হৈছে ভাৰত৷ যাৰ পৰিপ্ৰেক্ষিতত বাণিজ্যিক আৰু অৰ্থনৈতিক কাম-কাজসমূহ সুচাৰুৰূপে পৰিচালনা কৰাৰ ক্ষেত্ৰত কেন্দ্ৰ আৰু ৰাজ্য চৰকাৰক সহযোগিতা কৰিবলৈ আহ্বান জনাইছে সংস্থাটোৱে৷ সংস্থাটোৰ ৰাষ্ট্ৰীয় অধ্যক্ষ বি চি ভাৰ্টিয়াই কয় যে, পোন্ধৰ দিনত ৫০ শতাংশ ব্যৱসায়িক লোকচান হোৱাৰ পৰিৱৰ্তে ৭ দিনত এই হাৰ হৈছে প্ৰায় ৪৫ শতাংশ৷ এই লোকচানৰ পৰিমাণ সৰ্বাধিক হৈছে এফ এম চি জি, জুয়েলাৰী, সাজ-পোছাক, ৰন্ধন সামগ্ৰী, ইলেক্ট্ৰ’নিকছ, ফাৰ্নিচাৰ আদি খণ্ডসমূহ৷ সংস্থাটোৰ তথ্য অনুসৰি প্ৰায় ৭০ শতাংশৰ ব্যৱসায়িক লোকচানৰ সন্মুখীন হৈছে উপহাৰ আৰু জোতা-চেণ্ডেলৰ বিপণীসমূহ৷ ক’ভিডৰ তৃতীয় ঢৌৰ আশংকাৰ মাজত চৰকাৰে গ্ৰহণ কৰা নিষেধাজ্ঞাৰ পাছত দেশে প্ৰায় ২.৫ লাখ কোটি টকাৰ লোকচানৰ সন্মুখীন হৈছে৷