ডিজিটেল ডেস্কঃ ফাল্গুনী পাঠক আৰু নেহা কক্কৰৰ মাজত সৃষ্টি হোৱা বিভাজন ছ’চিয়েল মিডিয়াত চৰ্চাৰ বিষয় হৈ পৰিছে। নেহা কক্কৰে ফাল্গুনীৰ পুৰণি জনপ্ৰিয় গীত 'মেইনে পায়ল হায় ছনকাই'ৰ ৰিমেক কৰিছিল যিটোৰ বাবে সমালোচনা আৰু ট্ৰলৰ সন্মুখীন হৈছে নেহা। ইফালে ফাল্গুনীৰ পুৰণি গীতবোৰ মানুহে শুনিবলৈ আৰম্ভ কৰিছে। যোৱা এসপ্তাহৰ ভিতৰত বহুতে ইউটিউবত ফাল্গুনী পাঠকৰ গান চাৰ্ছ কৰি শুনিছে। একে সময়তে বহু লোকে ফাল্গুনী পাঠকৰ ব্যক্তিগত জীৱনৰ বিষয়েও অনুসন্ধান কৰি আছে। ফাল্গুনীৰ জীৱনৰ লগত জড়িত কিছুমান তথ্য জানো আহক।
নৱৰাত্ৰিৰ সময়ত ভাৰতীয় কণ্ঠশিল্পী ফাল্গুনী পাঠকৰ আদৰ যথেষ্ট বৃদ্ধি পায়। ফাল্গুনী পাঠক 'ডাণ্ডিয়া কুইন' নামেৰে জনাজাত। খাৰত এটা গুজৰাটী পৰিয়ালত জন্মগ্ৰহণ কৰিছিল ফাল্গুনীয়ে। সৰুৰে পৰা তেওঁ গান গোৱাৰ প্ৰতি আকৰ্ষিত আছিল। ৰেডিঅ’ত গীত শুনি শুনি তেওঁৰ মাজত এই চখটো জাগ্ৰত হৈছিল। ৯ বছৰ বয়সতে ফাল্গুনীয়ে ১৫ আগষ্ট উপলক্ষে মঞ্চত গীত পৰিবেশন কৰিছিল, যাৰ বাবে তেওঁৰ পিতৃ অতিশয় ক্ষুব্ধ হৈছিল।
মঞ্চত ফাল্গুনীয়ে গাইছিল 'লেইলা মে লেইলা' গীত। এই কথাত ফাল্গুনীৰ পিতৃৰ বহুত খং উঠিছিল আৰু কণমানি ফাল্গুনীক তেওঁ পিটিছিল। ফাল্গুনীৰ মাতৃয়ে তেওঁৰ গান গোৱা চখটোক সমৰ্থন কৰিছিল। মাতৃৰ পৰা ফাল্গুনীয়ে গুজৰাটী লোকগীত শিকিছিল। তাৰপাছত নৱৰাত্ৰিৰ অনুষ্ঠানত কোৰাছ হিচাপে তেওঁ গান গাবলৈ আৰম্ভ কৰিছিল।
ফাল্গুনী পাঠকক মানুহে সদায় ল’ৰাৰ গেটআপত দেখি আহিছে। ফাল্গুনীক মহিলাৰ সাজ-পোচাক পৰিধান কৰা দেখা নাযায়। তেওঁ চুলিও সদায় বয়কাট কৰি ৰাখে। ল’ৰাৰ গেটআপত থাকি ভাল পায় কণ্ঠশিল্পীগৰাকীয়ে। ইয়াৰ আঁৰৰ কাৰণ ফাল্গুনীয়ে কৈছিল যে ফাল্গুনীৰ ৪ গৰাকী বায়েক আছে। মাক-দেউতাকে ৪ জনী ছোৱালীৰ পাছত এটা ল’ৰা সন্তানৰ কামনা কৰিছিল যদিও ফাল্গুনীৰ ৰূপত পুনৰ জন্ম হ’ল এগৰাকী কন্যা।
ফাল্গুনীৰ বায়েকহঁতেও এজন ভায়েকৰ আশা কৰিছিল। সেয়েহে তেওঁলোকে ভনীয়েক ফাল্গুনীক ল’ৰাৰ দৰে সাজ-পোছাক পিন্ধাই ৰাখিছিল। এনেদৰে পিন্ধোতে পিন্ধোতে ল’ৰাৰ সাজ-পোছাকতে নিজকে সহজ যেন লগা হ’ল ফাল্গুনীৰ। স্কুলৰ দিনত তেওঁ ছোৱালীৰ ইউনিফৰ্ম কেৱল বাধ্যতামূলকভাৱেহে পিন্ধিছিল। ডাঙৰ হৈয়ো তেওঁ নাৰীৰ পোচাকৰ প্ৰতি কোনো আকৰ্ষণ নকৰা হ’ল। সেয়ে তেওঁ যেনেদৰে থাকি ভালপায় তেনেদৰেই থাকিবলৈ ল’লে।
ফাল্গুনী পাঠকে এতিয়ালৈকে বিবাহপাশত আৱদ্ধ হোৱা নাই। ১৯৯৮ চনত তেওঁৰ প্ৰথম এলবাম 'য়াদ পিয়া কি আনে লগি'ৰ পাছত তেওঁ ৰাতিটোৰ ভিতৰতে জনপ্ৰিয় হৈ উঠে। ফাল্গুনী পাঠকে উপহাৰ দিছিল বেক টু বেক ছুপাৰহিট গান। যিবোৰ গীতে আজিও মানুহৰ বুকুত নিগাজীকৈ বাস কৰি আছে। তেওঁৰ গানবোৰ প্ৰথম মুকলি হওতে মানুহ যিমান আপ্লুত হৈছিল, এতিয়াও সেই গানবোৰ শুনি সিমানেই আপ্লুত হয়। সেয়াই ফাল্গুনী পাঠকৰ গানৰ যাদু।
Continue Reading
