ডিজিটেল ডেস্কঃ লাডাখৰ স্বাৰ্থত আৰম্ভ কৰা অনশন অৱশেষত ২১ দিনৰ পিছত ভংগ কৰিলে পৰিৱেশ কৰ্মী সোনম ৱাংচুকে । তেওঁ ৬ মাৰ্চৰ পৰা অনশনত বহিছিল। অৱশ্যে ছ'চিয়েল মিডিয়াত তেওঁ কৈছে যে তেওঁ তেওঁৰ অনশন সমাপ্ত কৰিলেও তেওঁৰ যুঁজ অব্যাহত থাকিব। সোনমে লাডাখক পূৰ্ণ ৰাজ্যৰ মৰ্যাদা দিয়াকে ধৰি কেইবাটাও দাবীৰ সমৰ্থনত অনশন কৰি আছিল। তেওঁ পানী আৰু নিমখৰ বাহিৰে আন একো খোৱা নাছিল। ৱাংচুকে কয় "লাডাখৰ সাংবিধানিক সুৰক্ষা আৰু ইয়াৰ জনসাধাৰণৰ ৰাজনৈতিক অধিকাৰৰ বাবে মোৰ যুঁজ অব্যাহত থাকিব। "
সোনমৰ অনশনস্থলীত হাজাৰ হাজাৰ লোক উপস্থিত আছিল। তাত উপস্থিত থকা মহিলাৰ এটা দলে কয় যে তেওঁলোকে এইবাৰ একে দাবীৰে অনশন আৰম্ভ কৰিব। লাডাখক ৰাজ্যৰ মৰ্যাদা দিয়াৰ উপৰি সোনমৰ দাবী আছিল হিমালয়ৰ পৰিবেশ সুৰক্ষিত কৰা। তেওঁ কৈছিল যে তেওঁৰ অনশন ২১ দিন ধৰি অব্যাহত থাকিব পাৰে। কিন্তু চৰকাৰৰ ফালৰ পৰা এতিয়ালৈকে সোনমৰ দাবী সন্দৰ্ভত কোনো ইংগিত প্ৰদান কৰা পৰিলক্ষিত হোৱা নাই।
সোনমে মঙলবাৰে এটা ভিডিঅ' বাৰ্তাত পুনৰ কেন্দ্ৰক উদ্দেশ্য কৰি তেওঁৰ দাবী উত্থাপন কৰে। তেওঁ হাতত এগিলাচ অতি চেঁচা পানী লৈ আছিল । তেওঁ কৈছিল যে মাইনাছ ১০ ডিগ্ৰী চেলচিয়াছতো তেওঁৰ সৈতে ৩৫০ জন লোক আছে। সোনমে কৈছে যে চৰকাৰে প্ৰাকৃতিক সম্পদৰ সুৰক্ষাৰ বাবে ২০১৯-২০ বৰ্ষত দিয়া আশ্বাস পালন কৰা নাই । লাডাখক পূৰ্ণ ৰাজ্যৰ মৰ্যাদা দিয়া হোৱা নাই বা ইয়াত পৰিৱেশ সুৰক্ষিত কৰাৰ বাবে কোনো দৃঢ় পদক্ষেপ গ্ৰহণ কৰা হোৱা নাই। সোনমে কয় "চৰকাৰে কয় যে ভাৰত গণতন্ত্ৰৰ মাতৃ। কিন্তু সেই ভাৰতত লাডাখৰ জনসাধাৰণৰ গণতান্ত্ৰিক অধিকাৰ কাঢ়ি লোৱা হৈছে। নতুন দিল্লীৰ পৰা নিয়ন্ত্ৰিত চৰকাৰে চাৰি বছৰৰ পিছতো কোনো প্ৰতিশ্ৰুতি পূৰণ কৰা নাই। এয়া বিশ্বাস ভংগৰ নামান্তৰ মাথো।’’
Continue Reading
