লাহৰীঘাটৰ পৰা বিক্ৰী কৰা ১১ শ্ৰমিকক অন্ধপ্ৰদেশত জীৱন্তে উদ্ধাৰ

ডিজিটেল ডেস্কঃ পেটৰ তাড়নাত, ল’ৰা-ছোৱালীক দুবেলা দুমুঠি অন্ন আৰু বিদ্যালয়ৰ খৰচৰ বাবে পৃথিৱীৰ প্ৰত্যেকজনলোকে নিয়মিত কৰ্ম কৰে। পাৰ্থক্য মাথোঁ এটায়, কোনোবাই হয়তো দিনটো শীত-তাপ নিয়ন্ত্রীত কোঠাত বহি কাম কৰে আন কোনোবাই শীত-তাপ, বতাহ-বৰষুণ নেওচি ৰাস্তা-পদূলি, নলা-নৰ্দমা চাফা কৰে। আজিৰ এই উচ্চশিক্ষিত সমাজত একাংশ নীচ মনোভাবাপন্ন ব্যক্তিৰ মতে খাটিখোৱা শ্ৰমিক শ্ৰেণীৰ লোকসকলৰ যেন কোনো মূল্য নাই। সামান্য কেইটিমান টকাৰ বাবে অন্য সামগ্রীৰ দৰে কাম দিয়াৰ চলেৰে বিক্ৰী কৰে এই শ্ৰমিকসকলক। বিগত কিছুদিনৰ পূর্বে লাহৰিঘাটৰ পৰা কেৰালাত কাম বিচাৰি যোৱা ১১ শ্ৰমিকক বিক্ৰী কৰিছিল অন্ধ্ৰপ্ৰদেশৰ দালালৰ হাতত। অসম আৰক্ষী আৰু অন্ধ্ৰপ্ৰদেশ আৰক্ষীৰ সহযোগত কৃষ্ণা নদীৰ এটি দ্বীপৰ পৰা জীৱন্তে উদ্ধাৰ হ’ল ১১ শ্ৰমিক। কৃষ্ণা নদীৰ মুৰাভাকণ্ড দ্বীপৰ পৰা উদ্ধাৰ কৰা হয় শ্ৰমিক কেইজনক। 

জানিব পৰা মতে শ্ৰমিক কেইজন  মৰিগাঁও জিলাৰ লাহৰীঘাট থানাৰ অৰ্ন্তগত বৰছলা গাঁৱৰ আৰু নগাঁও জিলাৰ কচুৱাৰ বাসিন্দা।

ৱাহেদ আলী, মতিবুৰ ৰহমান, বাকিৰ হুছেইন, আজিম উদ্দিন, আকবৰ আলী, মতিবুৰ ৰহমান, দিলদাৰ হুছেইন, মেহেবুব হুছেইন, ছাদিকুৰ ৰহমান, ৰাজিবুল ইছলাম আৰু ইনামূল হুছেইন নামৰ শ্ৰমিক কেইজন কামৰ সন্ধানত কেৰালাৰ পৰা চেন্নাইলৈ গৈছিল।

আৰু তাতেই দুষ্টচক্ৰই যুৱক কেইজনক অন্ধ্ৰপ্ৰদেশত বিক্ৰী কৰাৰ পাছত কুনাল জিলাৰ মুচামাৰী থানাৰ অৰ্ন্তগত মুৰাভাকণ্ড দ্বীপৰ মাজত আবদ্ধ হৈ আছিল শ্ৰমিক কেইজন। লোক কেইজনৰ পৰা মোবাইল ফোন, কাপোৰ-কানি টকা-পইচা সকলো জব্দ কৰি কৃষ্ণা নদীৰ এটা দ্বীপৰ মাজত আবদ্ধ কৰি মাছ ধৰা কামত নিয়োজিত কৰিছিল। কিন্তু বাকিৰ নামৰ এজন শ্ৰমিকে গোপনে ৰখা মোবাইলৰ পৰা পৰিয়ালৰ লোকক ঘটনা সম্পৰ্কে জনাবলৈ সক্ষম হয়। এই খবৰ পোৱাৰ পাছত যুৱক কেইজনৰ পিতৃ-মাতৃয়ে বৰচলা আৰক্ষী চকীত অৱগত কৰায় আৰু লাহৰীঘাটৰ বিধায়ক আচিফ নাজাৰৰ লগত সংযোগ স্থাপন কৰিবলৈ চেষ্টা কৰি ব্যৰ্ধ হয়। উপায়বিহীন হৈ আবদ্ধ হৈ থকা শ্ৰমিক কেইজনৰ পৰিয়ালৰ লোকে অবশেষত আফতাপ হুছেইন নামৰ এজন স্থানীয় যুৱকৰে সৈতে যোগাযোগ কৰি তেওঁৰ জৰিয়তে মৰিগাঁও জিলাৰ আৰক্ষী অধীক্ষক অৰ্পনা নটৰাজন আৰু ডিএছপিৰ লগত যোগাযোগ কৰি আফটাপসহ তিনি স্থানীয় যুৱক ৰাওনা হয় অন্ধ্ৰপ্ৰদেশলৈ। অন্ধ্ৰপ্ৰদেশ বিজয়াৱাণ্ডাত উপস্থিত হৈ স্থানীয় আৰক্ষীৰ লগত যোগাযোগ কৰাত আৰক্ষীয়ে গুৰুত্ব নিদিয়াত নগাঁও লোকসভা সমষ্টিৰ সাংসদ প্ৰদ্যুৎ বৰদলৈৰ লগত ফোনত যোগাযোগ কৰে। মৰিগাঁও জিলা আৰক্ষী অধীক্ষকৰ লগতে বৰদলৈয়েও

অন্ধ্ৰপ্ৰদেশৰ এছপিৰ লগত যোগাযোগ কৰে আৰু অন্ধ্ৰপ্ৰদেশৰ আমলাপুৰামৰ সমষ্টিৰ সাংসদ চিনেটা অনুৰাধাৰ মহানুভৱতাত শ্ৰমিক কেইজনৰ উদ্ধাৰ সম্ভৱ হৈ পৰে। শাসকীয় দলৰ সাংসদ গৰাকীয়ে ঘটনাটোৰ বিষয়ে অৱগত হোৱা মাত্ৰকে আৰক্ষীৰ সহযোগত লোকেচনৰ ভিত্তিত কৃষ্ণা নদীৰ মুৰাভাকণ্ড দ্বীপৰ পৰা আটাইকেইজন শ্ৰমিকক উদ্ধাৰ কৰিবলৈ সক্ষম হয়। শনিবাৰ আৰু সোমবাৰে আটাইকেইজন শ্ৰমিক নিজা ঘৰত উপস্থিত হয়।