ডিজিটাল ডেস্কঃএগৰাকী ২০ বছৰীয়া সম্ভাৱনাপূৰ্ণ অভিনেত্ৰী৷ নাম তুনিশা শৰ্মা৷ শনিবাৰে টিভি অভিনেত্ৰী তুনিশা শৰ্মাই শ্বুটিঙৰ সময়তে মেকআপ ৰূমত ওলমি থকাৰ কথাই এতিয়া সমগ্ৰ দেশতে প্ৰতিক্ৰিয়াৰ সৃষ্টি কৰিছে৷ তুনিশাৰ মৃত্যু ৰহস্য উদ্ঘাটন কৰিবলৈ গৈ আৰক্ষীয়ে লাভ কৰিছে কেইবাটাও গুৰুত্বপূৰ্ণ তথ্য ৷ অভিনেত্ৰী তুনিশাক আত্মহত্যাৰ বাবে প্ৰৰোচিত কৰাৰ অভিযোগত সহ-অভিনেতা শ্বীজান খানক গ্ৰেপ্তাৰ কৰিছে আৰক্ষীয়ে৷ তুনিশাৰ মৃত্যুৰ সৈতে লাভ জেহাদৰ সম্পৰ্কও বিচাৰি পাইছে বহুতে৷
তুনিশাৰ সৈতে অভিনেতা শ্বীজান খানৰ সম্পৰ্ক থকা বুলি জানিব পৰা গৈছে। তুনিশাৰ আত্মহত্যাৰ পিছতে আৰক্ষীয়ে তেওঁৰ সহ-অভিনেতা শ্বীজান মহম্মদ খানক ভাৰতীয় দণ্ডবিধিৰ (আইপিচি) ৩০৬ ধাৰাৰ অধীনত গ্ৰেপ্তাৰ কৰা হৈছে। খবৰ অনুসৰি তুনিশাই শ্বীজান খানৰ সৈতে সম্পৰ্ক ছিন্ন কৰিছিল ৷ ইয়াৰ পিছতে আৰম্ভ হৈছিল অভিনেতাজনৰ সৈতে সংঘাত৷ সেই সংঘাতৰ পৰিণতিতে তুনিশাই আত্মহত্যা কৰা বুলি বহুতে সন্দেহ কৰিছে৷ অভিযোগ অনুসৰি শ্বীজান খানে তুনিশাক আত্মহত্যা কৰিবলৈ প্ৰৰোচিত কৰিছিল৷
অভিনেত্ৰীগৰাকীয়ে টিভি ধাৰাবাহিক আলী বাবাঃ দস্তান-ই-কাবুলৰ দৃশ্যগ্ৰহণ কৰি আছিল। শ্বুটিঙৰ মাজতে হঠাতে অন্তৰ্ধান হৈ পৰা তুনিশাৰ মৃতদেহ উদ্ধাৰ হয় মেক আপ ৰূমত৷ তুনিশাক ততাতৈয়াকৈ চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত বুলি ঘোষণা কৰে। তুনিশাই কেটৰিনা কাইফ আৰু বিদ্যা বালানৰ দৰে তাৰকাৰ সৈতেও অভিনয় কৰিছিল৷এখন ছবিত তেওঁ কেটৰিনা কাইফৰ সৰু কালৰ চৰিত্ৰত অভিনয় কৰিছিল। 
ইণ্টাৰনেট ৱালা লাভ, ইশ্ক সুভাল্লাহ, গায়েব, শ্বেৰ-ই-পাঞ্জাৱ: মহাৰাজা ৰঞ্জিত সিঙৰ দৰে টেলিভিছনৰ অনুষ্ঠান সমূহৰ জড়িয়তে তুনিশা সকলোৰে মাজত পৰিচিত হৈ পৰিছিল৷ ইপিনে আজি আৰক্ষীয়ে তুনিশাক আত্মহত্যা কৰিবলৈ বাধ্য কৰা বুলি অভিযোগ উঠা শ্বীজান মহম্মদ খানক আদালতত হাজিৰ কৰোৱাব৷
Continue Reading
