লিডুত ডাম্পাৰ আৰু টাটা বাহনৰ মুখামুখি সংঘৰ্ষ; তিনিজন গুৰুতৰভাৱে আহত

ডিজিটেল ডেস্ক: মাৰ্ঘেৰিটা সম জিলাৰ লিডুত সংঘটিত হৈছে এক ভয়ংকৰ পথ দুৰ্ঘটনা। লিডু বৈদ্যুতিক বিভাগৰ কাৰ্যালয়ৰ সন্মুখত শিল কঢ়িয়াই অনা এখন দ্ৰুতবেগী ডাম্পাৰ আৰু মাকুমৰ পৰা জাগুন অভিমুখে গৈ থকা এখন টাটা মাঞ্জা বাহনৰ মাজত মুখামুখি সংঘৰ্ষ হয়।

সংঘৰ্ষৰ ফলত টাটা মাঞ্জা বাহনখনৰ সন্মুখভাগ সম্পূৰ্ণৰূপে বিধ্বস্ত হয়। দুৰ্ঘটনাত বাহনখনৰ চালকসহ মুঠ তিনিজন লোক গুৰুতৰভাৱে আহত হয়।

দুৰ্ঘটনাৰ পিছতে স্থানীয় ৰাইজে তৎপৰতাৰে আহতসকলক উদ্ধাৰ কৰি লিডু ক্ষুদ্ৰ প্ৰাথমিক স্বাস্থ্যকেন্দ্ৰলৈ লৈ যায়। প্ৰাথমিক চিকিৎসাৰ অন্তত তিনিওজনকে উন্নত চিকিৎসাৰ বাবে মাৰ্ঘেৰিটা এফ আৰ ইউলৈ প্ৰেৰণ কৰা হয়।

আহতসকলক সুকুৰ আলি, মায়া ঠাকুৰীয়া আৰু মিজলি বুলি জানিব পৰা গৈছে। ইফালে, দুৰ্ঘটনাৰ পাছতে ডাম্পাৰখনৰ চালক ঘটনাস্থলীৰ পৰা পলায়ন কৰে।

ঘটনাস্থলীত সংশ্লিষ্ট কৰ্তৃপক্ষ উপস্থিত হৈ পৰিস্থিতিৰ বুজ লোৱাৰ লগতে দুৰ্ঘটনাটোৰ প্ৰকৃত কাৰণ জানিবলৈ তদন্ত অব্যাহত ৰাখিছে।