ডিজিটেল ডেস্ক: উত্তৰ প্ৰদেশৰ আগ্ৰাত উন্মোচিত হৈছে ভগ্ন সম্পৰ্ক আৰু ভাঙি যোৱা বিশ্বাসৰ এক কৰুণ কাহিনী। তাজগঞ্জ আৰক্ষী থানা এলেকাত এগৰাকী যুৱতীয়ে আত্মহত্যা কৰে। মৃত্যুৰ পূৰ্বে তেওঁ এটা ভিডিঅ’ বনাই ছ’চিয়েল মিডিয়াত ভাইৰেল কৰিছিল, য’ত তেওঁ এজন আৰক্ষী কনিষ্টবলৰ বিৰুদ্ধে গুৰুতৰ অভিযোগ উত্থাপন কৰিছিল। বিবাহৰ ভুৱা প্ৰতিশ্ৰুতিৰে দীৰ্ঘদিন ধৰি শাৰীৰিক আৰু মানসিক অত্যাচাৰৰ সন্মুখীন হোৱা বুলি অভিযোগ কৰে যুৱতীগৰাকীয়ে। যুৱতীগৰাকীৰ মৃত্যুৰ পিছত এই বিষয়টোৱে চৰ্চা লাভ কৰে আৰু তদন্তত নামে আৰক্ষী।
খবৰ অনুসৰি যুৱতীগৰাকীয়ে আগ্ৰাত নিয়োজিত এজন আৰক্ষী কনিষ্টবলৰ সৈতে লিভ ইন ৰিলেচনত বাস কৰিছিল। অভিযুক্ত কনিষ্টবলজনৰ নাম জে বি গৌতম। খবৰ অনুসৰি দুয়োৰে মাজত দীৰ্ঘদিনীয়া সম্পৰ্ক আছিল আৰু যুৱতীগৰাকীয়ে অভিযোগ কৰে যে কনিষ্টবলজনে তেওঁক বিয়া কৰাব বুলি প্ৰতিশ্ৰুতি দিছিল।
যুৱতীগৰাকীয়ে ভিডিঅ’ বনাই কয় যে বিবাহৰ প্ৰতিশ্ৰুতিৰে বাৰে বাৰে তেওঁক কনিষ্টবলজনে যৌন নিৰ্যাতন চলাইছিল আৰু পাছত তেওঁৰ পৰা আঁতৰি আহিছিল।
তেওঁ কয়, "জে বি গৌতমে মোক চাৰি বছৰ ধৰি পত্নী হিচাপে ৰাখিছিল আৰু এতিয়া মোক পৰিত্যাগ কৰিলে। মই যেতিয়া তেওঁক বিয়া কৰাবলৈ কওঁ তেতিয়া তেওঁ কয় যে তেওঁৰ পৰিয়াল এই বিয়াৰ বাবে মান্তি নহ'ব। তেওঁৰ ভায়েকেও আন এগৰাকী ছোৱালীৰ লগত একে কাম কৰি আছে। তেওঁৰ বিৰুদ্ধে কোনো ব্যৱস্থা লোৱা নহ'ব কাৰণ তেওঁ এজন আৰক্ষী। জে বি গৌতম আৰু তেওঁৰ পৰিয়াল মোৰ মৃত্যুৰ কাৰণ হ'ব। মই জীয়াই থকাৰ সময়ত ন্যায় নাপালোঁ, কিন্তু মৃত্যুৰ পাছত মোক ন্যায় লাগিব।"
ভিডিঅ’টো পোহৰলৈ অহাৰ পিছতে বিষয়টো আৰক্ষীৰ কাষ চাপিল। পৰিয়ালটোৰ অভিযোগৰ ভিত্তিত আৰক্ষীয়ে অভিযুক্ত কনিষ্টবলজনৰ বিৰুদ্ধে গোচৰ ৰুজু কৰে। বিষয়টোৰ গুৰুত্বৰ প্ৰতি লক্ষ্য ৰাখি ডিচিপি চিটি আলী আব্বাছে তাৎক্ষণিকভাৱে বিভাগীয় ব্যৱস্থা গ্ৰহণৰ নিৰ্দেশ দিয়ে। ইয়াৰ পিছতে অভিযুক্ত কনিষ্টবল জে বি গৌতমক নিলম্বন কৰা হয়।
তদন্তৰ সময়ত আৰক্ষীয়ে অভিযুক্ত কনিষ্টবলজনক গ্ৰেপ্তাৰ কৰি আদালতত হাজিৰ হোৱাৰ পিছত জে’ললৈ প্ৰেৰণ কৰে। আৰক্ষীয়ে জনোৱা মতে, সমগ্ৰ বিষয়টোৰ পুংখানুপুংখ তদন্ত চলি আছে আৰু ভাইৰেল ভিডিঅ’কে ধৰি অন্যান্য প্ৰমাণ তদন্তত অন্তৰ্ভুক্ত কৰা হৈছে। মৰণোত্তৰ পৰীক্ষাৰ অন্তত যুৱতীগৰাকীৰ মৃতদেহ পৰিয়ালৰ হাতত গতাই দিয়া হৈছে। এই গোচৰত উত্থাপিত তথ্যৰ ভিত্তিত অধিক আইনী ব্যৱস্থা গ্ৰহণ কৰা হ’ব বুলি আৰক্ষী বিষয়াসকলে কয়।
Continue Reading
