ডিজিটেল ডেস্কঃ ওড়িশাত সংঘটিত হৈছে এক লজ্জাজনক ঘটনা। ৰাজ্য খনত এগৰাকী বৃদ্ধাৰ মৃত্যুৰ পিছত তেওঁৰ মৃতদেহ সৎকাৰ নকৰাকৈয়ে দুদিন ধৰি পেলাই ৰখা হ’ল। কিন্তু কিয় এনে হ’ল? দৰাচলতে মহিলাগৰাকীৰ মৃত্যুৰ পিছত গাঁওবাসীয়ে মৃতকৰ পৰিয়ালক মাছে-মাংসই ভোজভাত খুৱাব লাগিব বুলি কৈছিল। দুখীয়া পৰিয়ালটোৱে ১০ কিলোগ্ৰাম পঠাৰ মাংস দিব নোৱাৰো বুলি কোৱাৰ বাবেই গাওঁবাসীয়ে মৃতদেহ সৎকাৰ কৰিবলৈ নাহিল।
এই লজ্জাজনক ঘটনাটো ঘটিছে ওড়িশাৰ ময়ূৰভঞ্জ অঞ্চলত।শনিবাৰে তেলাবিলা গাঁৱত ৭০ বছৰীয়া সোমবাৰী সিঙৰ মৃত্যু হয়। গাওঁখনৰ ৰীতি-নীতি অনুসৰি পৰিয়াল এটাত বিবাহ বা মৃত্যু হ'লে গাওঁখনৰ লোকসকলক ভোজ খুওৱাৰ পৰম্পৰা আছে। এনে পৰিস্থিতিত, যেতিয়া মৃতা মহিলাগৰাকীৰ জ্যেষ্ঠ পুত্ৰক এই ৰীতি-নীতি পালন কৰাৰ বাবে ১০ কিলোগ্ৰাম পঠাৰ মাংস দিয়াৰ দাবী কৰা হৈছিল, তেতিয়া তেওঁ আৰ্থিক দুৰ্বলতাৰ বাবে ভোজ আয়োজন কৰিবলৈ অক্ষম বুলি প্ৰকাশ কৰিছিল।
তাৰ পিছত বৃদ্ধ মহিলাগৰাকীৰ মৃতদেহ দুদিন পৰি ৰৈছিল। গাওঁবাসীয়ে মৃতদেহৰ অন্তিম সংস্কাৰ কৰা নাছিল। পিছত যেতিয়া পৰিয়ালটোৱে ভোজৰ আয়োজন কৰিবলৈ সাজু হৈছিল গাওঁবাসীয়ে তেতিয়াহে অন্ত্যেষ্টিক্ৰিয়াত উপস্থিত থাকিবলৈ সন্মত হৈছিল। ঘটনাটো এতিয়া বিভিন্ন জনৰ মাজত আলোচনাৰ বিষয় হৈ পৰিছে।
Continue Reading
