ডিজিটেল ডেস্কঃ লোকসভা নিৰ্বাচনৰ পূৰ্বে নৰেন্দ্ৰ মোদী চৰকাৰে পুনৰ উজ্জ্বলা যোজনাৰ অধীনত যোগান ধৰা গেছ চিলিণ্ডাৰৰ মূল্য হ্ৰাস কৰিলে। প্ৰধানমন্ত্ৰী উজ্জ্বলা যোজনাৰ অধীনত গেছৰ মূল্য পুনৰ ১০০ টকা হ্ৰাস কৰা হৈছে বুলি চৰকাৰী ভাবে প্ৰকাশ কৰা হৈছে। বুধবাৰে কেন্দ্ৰীয় কেবিনেটৰ এখন বৈঠকত সিদ্ধান্তটোত অনুমোদন দিয়া হয়।
আগষ্ট মাহৰ শেষৰ পিনে নৰেন্দ্ৰ মোদীৰ চৰকাৰে প্ৰতিটো ৰন্ধন গেছৰ চিলিণ্ডাৰত ২০০ টকা হ্ৰাস কৰাৰ সিদ্ধান্ত লৈছিল। একে সময়তে উজ্জ্বলা যোজনাৰ অধীনত গেছৰ চিলিণ্ডাৰত ২০০ টকাৰ অতিৰিক্ত ৰেহাই দিয়াৰ কথা ঘোষণা কৰা হৈছিল। এতিয়া, কেন্দ্ৰই উজ্জ্বলাৰ বাবে অতিৰিক্ত ৰেহাই বৃদ্ধি কৰাৰ সিদ্ধান্ত লৈছে। কেন্দ্ৰীয় মন্ত্ৰী অনুৰাগ ঠাকুৰে বুধবাৰে কয় যে উজ্জ্বলা যোজনাৰ বাবে অতিৰিক্ত ৰেহাই ২০০ টকাৰ পৰা ৩০০ টকালৈ বৃদ্ধি কৰা হৈছে।
দৰাচলতে কোভিড লকডাউনৰ আৰম্ভণিৰ পৰা ৰন্ধন গেছৰ মূল্য বৃদ্ধি পাই গৈছিল। ৰাজসাহায্যৰ পৰিমাণ হ্ৰাস কৰা হৈছিল। পৰিস্থিতি এনে হৈছিল যে ৰন্ধন গেছ ক্ৰয় কৰাৰ ক্ষেত্ৰত মধ্যবিত্ত শ্ৰেণীয়ে বাৰুকৈয়ে ক্ষতিগ্ৰস্ত হ'বলগীয়া হৈছিল। ৰন্ধন গেছৰ আকাশলংঘী মূল্য পাঁচখন ৰাজ্যৰ আগন্তুক বিধানসভা নিৰ্বাচন আৰু লোকসভা নিৰ্বাচনত কেন্দ্ৰৰ বাবে মূৰৰ বিষৰ কাৰণ হ'ব পাৰে বুলি ধাৰণা কৰিয়েই হয়তো এনেদৰে গেছ চিলিণ্ডাৰৰ দাম কমোৱা হৈছে।
১ মাৰ্চলৈকে, দেশত উজ্জ্বলা যোজনাৰ অধীনত প্ৰায় ৯ কোটি গ্ৰাহক আছিল। যদি কেন্দ্ৰই এই অতিৰিক্ত ৰাজসাহায্য দিয়ে তেন্তে বৃহৎ সংখ্যক গ্ৰাহক উপকৃত হ'ব।
Continue Reading
