ডিজিটেল ডেস্কঃ এগৰাকী প্ৰাৰ্থী। লোকসভা নিৰ্বাচনৰ তেওঁ বিজেপি দলৰ প্ৰাৰ্থী। সাধাৰণতে ৰাজকীয় পৰিয়ালৰ সৈতে জড়িত লোকসকল অগাধ সম্পত্তিৰ গৰাকী হয়। অপৰিসীম সম্পদ, বিলাসী গাড়ী আৰু বিশাল সম্পত্তিৰ মালিক হয় তেওঁলোক । অৱশ্যে এনে ধাৰণাক ভুল প্ৰতিপন্ন কৰিছে মহীশূৰ প্ৰাক্তন ৰাজপৰিয়ালৰ মুৰব্বী যদুবীৰ কৃষ্ণৰাজ দত্ত ৱাদিয়াৰে।
যুৱৰাজ যদুবীৰৰ নাই কোনো ভূমি, তেওঁৰ নিজা ঘৰ বা বাহন এখনো নাই। তেওঁ মহীশূৰ লোকসভা আসনৰ পৰা বিজেপিৰ প্ৰাৰ্থী হিচাবে থিয় দিছে। নিৰ্বাচন আয়োগৰ ওচৰত দাখিল কৰা নিৰ্বাচনী শপতনামাত যদুবীৰে তেওঁৰ মাটি বা ঘৰ আৰু বাহন নথকাৰ কথা ঘোষণা কৰিছে। গাড়ী-ঘৰ নাথাকিলেও শপতনামাখনত অৱশ্যে 'যুৱৰাজ' যদুবীৰে ৯ কোটি টকাৰ সম্পত্তি থকাৰ কথাও ঘোষণা কৰিছে। 'যুৱৰাজ'ৰ দ্বাৰা ঘোষিত ৯ কোটি টকাৰ সম্পত্তিৰ ভিতৰত আছে শ্বেয়াৰ হোল্ডিং আৰু অন্যান্য মূল্যৱান সামগ্ৰী।
শপতনামা অনুসৰি তেওঁৰ নামত কোনো বাহন পঞ্জীয়ন কৰা হোৱা নাই। তেওঁৰ পত্নী ত্ৰিশিকা কুমাৰী ৱাদিয়াৰৰ ১ কোটি টকাৰ সম্পত্তি আছে, আৰু তেওঁৰ পুত্ৰ আদ্যবীৰৰ ৩.৬ কোটি টকাৰ সম্পত্তি আছে। যদুবীৰৰ ওচৰত ৩.৪ কোটি টকাৰ সোণ আৰু ৰূপ আছে, আনহাতে ত্ৰিশিকাৰ ওচৰত ১ কোটি টকাৰ গহনা আছে।
যদুবীৰ আৰু ত্ৰিশিকাই লিটল বানিয়ান্স প্ৰাইভেট লিমিটেড আৰু ভীৰুন্দা ফাউণ্ডেচনকে ধৰি কেইবাটাও কোম্পানীৰ পৰিচালনাৰ দায়িত্ব পালন কৰি আহিছে। ৩২ বছৰীয়া 'যুৱৰাজ' যদুবীৰে কংগ্ৰেছ প্ৰাৰ্থী এম লক্ষ্মণৰ বিৰুদ্ধে মহীশূৰ লোকসভা আসনত প্ৰতিদ্বন্দ্বিতা কৰিছে। ইয়াৰ বিপৰীতে, মাণ্ড্যৰ পৰা কংগ্ৰেছ প্ৰাৰ্থী ভেংকটৰমন গৌদা ওৰফে ষ্টাৰ চান্দ্ৰুৱে নিৰ্বাচনী শপতনামাত ৬২২ কোটি টকাৰ সম্পত্তি থকাৰ কথা ঘোষণা কৰিছে। তেওঁৰ সম্পত্তিৰ ভিতৰত আছে মুখ্যতঃ ভূমি।
Continue Reading
