ডিজিটেল ডেস্কঃ মানৱীয় প্ৰমূল্যৰ যেন সাংঘাতিক অভাৱ ঘটিছে সমাজৰ একাংশ নাগৰিকৰ মাজত৷ এইবাৰ মানৱীয়তাক ভুলুণ্ঠিত কৰা এনে এটা ঘটনা সংঘটিত হ’ল ভাৰতৰ অৰ্থনৈতিক ৰাজধানী মুম্বাইত৷
এগৰাকী মহিলাক হত্যা কৰি পলিথিনেৰে মেৰিয়াই আলমাৰীত সুমুৱাই থোৱা অৱস্থাত মুম্বাই আৰক্ষীয়ে উদ্ধাৰ কৰে৷ ইতিমধ্যে আৰক্ষীয়ে হত্যাৰ অপৰাধত মহিলাগৰাকীৰ ২৩ বছৰীয়া জীয়েকক গ্ৰেপ্তাৰ কৰিছে৷
হত্যা হোৱা মহিলাগৰাকীৰ নাম বীণা জৈন বুলি জানিব পৰা গৈছে৷ মহিলাগৰাকীৰ শৰীৰটো বহু মাহ ধৰি এটা ষ্টীল আলমাৰীত সুমুৱাই থোৱা বাবে শৰীৰটো নষ্ট হৈ গৈছে বুলি আৰক্ষীয়ে জানিবলৈ দিছে৷
ইতিমধ্যে মহিলাগৰাকীৰ জী ৰিম্পল জৈনক আৰক্ষীয়ে বহু ঘন্টা ধৰি সোধপোছ কৰাৰ পিছত গ্ৰেপ্তাৰ কৰে৷ ৰিম্পল জৈন নিজৰ মাতৃ বীণা জৈনৰ সৈতে মুম্বাইৰ লাগবাগ অঞ্চলত বাস কৰিছিল৷
মৃত মহিলাগৰাকীৰ ভাতৃ আৰু ভাগিনে যোৱা মঙলবাৰে আৰক্ষীক মহিলাগৰাকীৰ নিৰুদ্দেশৰ ওপৰত ভিত্তি কৰি আৰক্ষীক তদন্তৰ বাবে আহ্বান জনাই৷ মুম্বাইৰ জেষ্ঠ আৰক্ষী বিষয়া প্ৰৱীণ মুণ্ডেই জানিবলৈ দিয়া মতে মহিলাগৰাকী যোৱা বছৰৰ ২৬ নৱেম্বৰৰ পৰাই নিৰুদ্দেশ হৈ আছিল৷
এই অভিযোগৰ ভিত্তিত বীণা জৈনৰ ঘৰৰ প্ৰথম মহলাৰ পৰা আলমাৰীত সুমুৱাই থোৱা অৱস্থাত তেখেতৰ মৃতদেহ আৰক্ষীয়ে উদ্ধাৰ কৰে৷
Continue Reading
