ডিজিটেল ডেস্কঃ ''মাৰাডোনাই আমাক স্বৰ্গৰ পৰা চাই আছে। তেওঁৰ আৰ্শীবাদৰ বাবেই আমি ইমান দূৰ আগুৱাইছো। আমাক আগুৱাই নিছে তেওঁ। আশা কৰো, শেষ পৰ্যন্ত এই আশীৰ্বাদ আমাৰ লগত থাকিব।’’- কাটাৰ বিশ্বকাপৰ চেমি ফাইনেলত উপনীত হোৱাৰ পাছতে এইদৰে ডিয়েগ’ মাৰাডোনাক সোঁৱৰণ কৰিলে আৰ্জেণ্টিনাৰ অধিনায়ক লিঅ’নেল মেছিয়ে।
''দেশৰ সমৰ্থকসকলৰ স’তে আমি উল্লাস কৰিছো। প্ৰতিটো মুহূৰ্ত উপভোগ কৰিছো। সমৰ্থকসকলো অত্যন্ত সুখী৷’’- মেছিয়ে কয়৷
উল্লেখ্য যে আৰ্জেণ্টিনাই এতিয়ালৈকে দুবাৰ ফুটবল বিশ্বকাপ জয় কৰিছে। ১৯৭৮ চনত মাৰিঅ’ কেম্পেছৰ অধিনায়কত্বত বিশ্বজয়ৰ প্ৰথম সোৱাদ লাভ কৰিছিল লেটিন আমেৰিকান দেশখনে। তাৰ পাছত ১৯৮৬ চনত ডিয়েগ’ মাৰাডোনাই পুনৰ এই সোৱাদ দিয়ে দেশবাসীক। ১৯৮৬ চনৰ বিশ্বকাপতে মাৰাডোনাই অনবদ্য প্ৰদৰ্শন আগবঢ়াইছিল। বিশ্বকাপত আৰ্জেণ্টনাৰ হৈ মাৰাডোনাই কৰা প্ৰদৰ্শনৰ বাবে দেশবাসীয়ে এতিয়াও তেওঁক সুঁৱৰে।
মেছিৰ দৰেই একেই ভাষ্য আগবঢ়াইছে মাৰাডোনাৰ কন্যা ডালমাইও৷ মেছিক উদ্দেশ্যি তেওঁ কয়- ''লিঅ’, তোমাক লৈ আমি সপোন দেখিছো। বিশ্বকাপ লৈ দেশলৈ উভটি আহিবা। মনত ৰাখিবা, দেউতাই কিন্তু তোমালোকক ওপৰৰ পৰা চাই আছে। এই আৰ্জেণ্টিনাৰ দ্বাদশ ব্যক্তি মাৰাডোনা৷ নিজকে উজাৰি দিয়া৷’’
''ঈশ্বৰৰ ওচৰত প্ৰাৰ্থনা কৰো, দেউতাৰ অফুৰন্ত শক্তিৰে ভৰপূৰ হওক তোমালোকৰ দল৷’’- ডালমাই কয়৷
Continue Reading
