ডিজিটেল ডেস্কঃ এক জটিল ৰোগত আক্ৰান্ত হৈছে মাইক টাইচন। বক্সিঙৰ ৰিঙত এসময়ত ধুমুহাৰ সৃষ্টি কৰা প্ৰাক্তন হেভিৱেইট চেম্পিয়নগৰাকীয়ে ছায়াটিকা (sciatica) নামৰ স্নায়ুৰোগত আক্ৰান্ত হৈ পৰিছে। জানিব পৰামতে, এই ৰোগত আক্ৰান্ত হোৱাৰ বাবেই টাইছনে শেহতীয়াকৈ কথা কওঁতেও সমস্যাৰ সন্মুখীন হৈছে। যোৱামাহত তেওঁক মিয়ামি আন্তঃৰাষ্ট্ৰীয় বিমানকোঠত হুইলচেয়াৰৰ জৰিয়তে চলা-ফিৰা কৰা দেখা পোৱা গৈছিল।
সাংবাদিকক তেওঁ কয় যে তেওঁ ছায়াটিকাত ভুগি আছে আৰু দিনে দিনে এই অসুখ বাঢ়ি গৈ আছে। তেওঁ জনায় যে ছায়াটিকাৰ বাদে তেওঁৰ আন কোনো অসুখ নাই।
কিন্তু, কি এই ছায়াটিকা?
ছায়াটিকা হৈছে নিতম্ব আৰু ভৰিত হোৱা এবিধ বিষ। ছায়াটিক নামৰ স্নায়ুবিধ সংকুচিত হৈ পৰিলেই এই বিষ অনুভূত হয়। সাধাৰণতে ছায়াটিকা নিতম্বৰ পৰা আৰম্ভণি ঘটে। তাৰপাছতে এই বিষ ভৰিলৈকে বিয়পি পৰে। ভৰিৰ পৃষ্ঠভাগেৰে বিয়পি পৰে এই বিষ। বিষবিধ ৰোগী অনুযায়ী ভিন্ন ধৰণে অনুভূত হ’ব পাৰে। কিছু ৰোগীয়ে কমকৈ এই বিষ অনুভৱ কৰে, আনহাতে কিছু লোকৰ ক্ষেত্ৰত এই বিষে তীব্ৰ ৰূপ ধাৰণ কৰে। এই বিষে শাৰীৰিক জঠৰতাৰ সৃষ্টি কৰিব পাৰে। সাধাৰণতে শৰীৰৰ নিম্নভাগত থকা ভাৰটাব্ৰেল ডিস্ক, স্পাইনেল ষ্টেন’ছিছ, হাড়ৰ বিচ্যুতি আৰু আঘাতৰ বাবেই এই ৰোগে দেখা দিয়ে।
চিকিৎসাবিদসকলৰ মতে, শৰীৰৰ অত্যধিক ওজন বৃদ্ধি, শাৰিৰীক শ্ৰম তথা ব্যায়ামৰ অভাৱ, টোপনিহীনতাই এই ৰোগক তীব্ৰতৰ কৰি তোলে। তদুপৰি দীৰ্ঘসময় ধৰি বহি থকা আৰু গধুৰ বস্তু দাঙিলেও এই ৰোগে আসৈ পায়। ৰোগবিধ সঠিক সময়ত চিকিৎসা নকৰিলে আৰু দীৰ্ঘসময় ধৰি বৰ্তি থাকিলে ৰোগীজনৰ স্নায়ুসমূহ চিৰদিনৰ বাবে ধ্বংস হৈ যোৱাৰ সম্ভাৱনা থাকে। ফলস্বৰূপে কথা কোৱাৰ অক্ষমতা, পাৰকিনছন ডিজিজ, আলজেইমাৰ, এপিলেপ্সী আৰু ৰোগীৰ মানসিক অসুখৰো সৃষ্টি কৰিব পাৰে।
চিকিৎসাশাস্ত্ৰত ৰোগীবিধৰ নিদান বিভিন্নধৰণে উপলব্ধ আছে। কিন্তু আয়ুৰ্বেদৰ নিদানসমূহৰ দ্বাৰাও সহজভাৱে এই ৰোগৰ পৰা বাচি থাকিব পাৰি। চিকিৎসকসকলে জনোৱামতে, আয়ুৰ্বেদিক নিদানসমূহ এনেধৰণৰঃ
- ৪০ মিনিটৰ অত্যধিক সময় অবিৰামভাৱে থিয় হৈ থাকিব নালাগিব।
- নিয়মিতভাৱে যোগাভ্যাস তথা মকৰাসন, শালাভাসন, মৰ্কটাসান আৰু ভূজংগাসন কৰিব লাগিব।
- দুঘণ্টাৰ বেছি সময় একেটা পজিচনতে বহিব নোৱাৰিব। বহাৰ মাজে মাজে পাঁচ মিনিটৰ বিৰতি ল’ব লাগিব।
- ৰোগবিধত ভোগা শৰীৰৰ অংশসমূহত তেল মালিচ কৰিব লাগিব।
- তেল মালিচৰ বাবে মাহানাৰায়ণ তেল, অশ্বগন্ধা তেল আৰু ধনন্তৰম তেলৰ ব্যৱহাৰ কৰিব পাৰে।
- ইয়াৰ উপৰিও ঘৰুৱা তিল তেল আৰু মিঠাতেলৰো ব্যৱহাৰ কৰিব পাৰে।
- বিষত ভুগি থকা শৰীৰৰ অংশসমূহত উষ্ণ অথবা শীতল পানীৰ সেক দিব লাগে।
- সঠিক ভিজিয়’থেৰাপীৰ প্ৰয়োজন।
- প্ৰয়োজন অনুসৰি ৰোগীয়ে এমিকা, হায়পাৰকামৰ দৰে হোমিঅ’ দৰৱো ব্যৱহাৰ কৰিব পাৰে।
- যদি এইসমূহে ৰোগবিধ প্ৰতিৰোধ নকৰে, তেন্তে ৰোগীয়ে স্পাইন চাৰ্জাৰী কৰাটো অন্তিম সমাধান।
Continue Reading
