ডিজিটেল ডেস্কঃ মিছ ইউএছএ আৰ'বনি গেব্ৰিয়েলে ৮৩ জন প্ৰতিযোগীক চেৰ পেলাই মিছ ইউনিভাৰ্ছ-২০২২ৰ খিতাপ অৰ্জন কৰিবলৈ সক্ষম হৈছে। ৭১ সংখ্যক মিছ ইউনিভাৰ্ছ প্ৰতিযোগিতাখন আমেৰিকা যুক্তৰাষ্ট্ৰৰ লুইজিয়ানাৰ নিউ অৰলিন্সৰ নিউ অৰলিন্স মৰেল কনভেনচন চেণ্টাৰত অনুষ্ঠিত হৈছিল।
ভাৰতৰ মিছ ইউনিভাৰ্ছ ২০২১ হৰ্নাজ সান্ধুৱে আৰ'বনি গেব্ৰিয়েলৰ শিৰত মুকুট পিন্ধাই দিয়ে। এইবেলি প্ৰতিযোগিতা খনত দিভিতা ৰাইয়ে ভাৰতক প্ৰতিনিধিত্ব কৰিছিল। অৱশ্যে, শীৰ্ষ ১৬ সংখ্যক স্থানত থাকিও দিভিতা ৰাইয়ে মুকুট আজুৰি আনিবলৈ সক্ষম নহ’ল৷ 
মিছ ইউএছএ ২০২২ আৰু মিছ ইউনিভাৰ্ছ ২০২২ আৰ'বনি গেব্ৰিয়েল এগৰাকী ফেশ্বন ডিজাইনাৰ আৰু মডেল । তেওঁ নিজৰ কাপোৰৰ ষ্টাৰ্টআপ আৰ'বনি নোলাৰ মুখ্য কাৰ্যবাহী বিষয়া। মিছ ভেনিজুৱেলা আমাণ্ডা ডুডামেল আৰু মিছ ডমিনিকান ৰিপাব্লিক এন্দ্ৰেনা মাৰ্টিনেজ প্ৰথম আৰু দ্বিতীয় ৰানাৰ্ছ-আপ হিচাবে নিৰ্বাচিত হয়৷
দিভিতা ৰাইয়ে এই বছৰ মিছ ইউনিভাৰ্ছ পৰ্যায়ত ভাৰতক প্ৰতিনিধিত্ব কৰিছিল। ২৩ বছৰীয়া সুন্দৰীগৰাকী কৰ্ণাটকৰ। ২০২২ চনত তেওঁ মিছ ডিভা ইউনিভাৰ্ছৰ খিতাপ জয় কৰিছিল। কিন্তু মিছ ইউনিভাৰ্ছৰ শেষ যুদ্ধত দিভিতাই টিকি থাকিব নোৱাৰিলে৷
Continue Reading
