নেপালত দুৰ্ঘটনাগ্ৰস্ত হোৱা বিমানখনত আছিল ৫ জন ভাৰতীয়, ৪০ টা মৃতদেহ উদ্ধাৰ

ইয়েতি এয়াৰলাইনছৰ মুখপাত্ৰ সুদৰ্শন বৰতৌলাই কৈছিল যে দুটি  শিশুসহ ১০ জন বিদেশী নাগৰিকো বিমান খনত আছিল। বিমানবন্দৰৰ তথ্য অনুসৰি বিমানখনত ৫৩ জন নেপালী, পাঁচজন ভাৰতীয়, চাৰিজন ৰাছিয়ান, এজন আইৰিছ, দুজন কোৰিয়ান, এজন আৰ্জেণ্টিনাৰ নাগৰিক আৰু এজন ফৰাচী নাগৰিক যাত্ৰী হিচাবে  আছিল। ইফালে পোখৰা বিমানবন্দৰত এখন যাত্ৰীবাহী বিমান দুৰ্ঘটনাগ্ৰস্ত হোৱাৰ পিছত নেপাল চৰকাৰে এখন জৰুৰীকালীন কেবিনেট বৈঠক আহ্বান কৰিছে। দুৰ্ঘটনাৰ খবৰ পাই নেপালৰ প্ৰধানমন্ত্ৰী পুষ্প কমল দাহাল কাঠমাণ্ডুৰ ত্ৰিভুৱন আন্তঃৰাষ্ট্ৰীয় বিমানবন্দৰত উপস্থিত হয়। তাৰ পৰাই তেওঁ উদ্ধাৰ কাৰ্য্যৰ ওপৰত চকু ৰাখিছে। তেওঁ নিৰাপত্তা বাহিনীক উদ্ধাৰ অভিযান পূৰ্ণ গতিত অব্যাহত ৰাখিবলৈ নিৰ্দেশ দিছে। তদুপৰি, প্ৰধানমন্ত্ৰীয়ে স্থানীয় লোকসকলক উদ্ধাৰ কাৰ্য্যত সহায় কৰিবলৈও  আহ্বান জনাইছে।

 ইয়েতি এয়াৰলাইনছৰ বিমানখন পোখৰাৰ পৰা কাঠমাণ্ডুলৈ গৈ আছিল। ই কাস্কি জিলাৰ ওচৰত খহি পৰিছিল। উৰণৰ ২০ মিনিটৰ ভিতৰতে বিমানখন দুৰ্ঘটনাত পতিত হৈছিল। নেপালৰ অসামৰিক বিমান পৰিবহন কৰ্তৃপক্ষই কৈছে  যে ইয়েতি এয়াৰলাইনছৰ বিমান ৯এন-এএনচি এটিআৰ-৭২ পুৱা ১০.৩৩ বজাত কাঠমাণ্ডুৰ পৰা পোখৰালৈ উৰা মাৰিছিল। অৱশ্যে পোখৰা বিমানবন্দৰত অৱতৰণ কৰোঁতেবিমানখন পুৰণি বিমানবন্দৰ আৰু নতুন বিমানবন্দৰৰ মাজত চেতি নদীৰ পাৰত দুৰ্ঘটনাগ্ৰস্ত হয়। 

উল্লেখ্য  যোৱা  ৩০ বছৰত নেপালত কমেও ২৭ টা মাৰাত্মক বিমান দুৰ্ঘটনা সংঘটিত হৈছে। ছমাহ আগতেও নেপালত এখন বিমান দুৰ্ঘটনাত পতিত হৈছিল।  ফ্লাইট ট্ৰেকিং ৱেবছাইট ফ্লাইটৰাডাৰ২৪-ৰ মতে দুৰ্ঘটনাগ্ৰস্ত হোৱা এটিআৰ৭২ বিমানসমূহ ১৫ বছৰ পুৰণি  বিমান।