ডিজিটেল ডেস্ক : আজি সমগ্ৰ দেশতে
পালন কৰা হ’ব পোহৰ আৰু আনন্দৰ উৎসৱ দীপাৱলী। দীপাৱলী উপলক্ষে মালক্ষ্মী পূজাৰ বিশেষ
তাৎপৰ্য্য আছে। মধ্যপ্ৰদেশৰ ৰতলামত অৱস্থিত মহালাক্ষ্মী মন্দিৰটো দীপাৱলী উপলক্ষে ফুলেৰে
নহয় টকাৰে সজাই তোলা হয় আৰু ভক্তসকলক প্ৰসাদ হিচাপে প্ৰদান কৰা হয় নোটৰ উপৰি সোণ-ৰূপৰ
অলংকাৰ।
মালক্ষ্মীৰ এই বিশেষ মন্দিৰটোত সকলো ধৰণৰ মুদ্ৰা আগবঢ়োৱা হয়। পৌৰাণিক কাহিনী অনুসৰি মহালক্ষ্মী মন্দিৰ নামেৰে জনাজাত এই মন্দিৰত প্ৰাচীন কালত ৰজা-মহাৰজাই মন্দিৰত মুদ্ৰাৰ উপৰি সোণ-ৰূপৰ অলংকাৰ আগবঢ়াইছিল। পাছলৈ ইয়াত আৰম্ভ হ’ল টকা আগবঢ়োৱাৰ পৰম্পৰা আৰু ফুলৰ সলনি টকাৰে সজাই তোলা হয় মন্দিৰটো।
স্মৰ্তব্য যে এই মন্দিৰত ধনতেৰছৰ পৰাই আৰম্ভ হয় দীপাৱলী উৎসৱ আৰু পাঁচদিনৰ বাবে দীপোৎসৱৰ বিশাল আয়োজন কৰা হয়। এই সময়ত দেৱী লক্ষ্মীৰ সৈতে ভগৱান কুবেৰৰো পূজা কৰা হয়। বিশেষ কথাটো হ’ল যে এই মন্দিৰ চাবলৈ অহা ভক্তসকলক প্ৰসাদত টকা দিয়া হয় আৰু বহুতে প্ৰসাদ হিচাপে সোণ-ৰূপো লাভ কৰে।
Continue Reading
