ডিজিটেল ডেস্কঃ জীৱন শেষ কৰাটো ইমান সহজ নহয়। বহু সময়ত মানুহ এজন ভিতৰৰ পৰা ইমানেই ভাঙি যায় যে তেওঁৰ নিয়ন্ত্ৰণত একো নাথাকে, তেওঁ জীয়াই থকাৰ সকলো সাহস হেৰুৱাই পেলায়। শেহতীয়াকৈ তুনিশা শৰ্মাৰ আত্মহত্যাৰ খবৰ চৰ্চাত থকাৰ সময়তে এতিয়া খবৰ আহিছে যে আন এজন অভিনেতাই আত্মহত্যা কৰি নিজৰ জীৱনৰ অন্ত পেলাইছে। খবৰ অনুসৰি টলিউডৰ তেলেগু অভিনেতা সুধীৰ বাৰ্মাই নিজৰ ঘৰতে আত্মহত্যা কৰিছে। বৰ্তমানলৈকে তেওঁৰ আত্মহত্যাৰ কাৰণ জানিব পৰা হোৱা নাই।
সুধীৰ বাৰ্মাই বিশাখাপট্টনমৰ নিজ গৃহত আত্মহত্যা কৰে। তেওঁৰ মৃত্যু নিশ্চিত কৰি তেওঁৰ এগৰাকী সহ অভিনেতাই লিখিছে – ইমান মৰমলগা মানুহ... আপোনাৰ সৈতে কাম কৰি ভাল লাগিল৷ বিশ্বাস কৰিব নোৱাৰি যে আপুনি আৰু এই পৃথিৱীত নাই।
তেওঁ কিয় এনে পদক্ষেপ ল’লে, তাৰ তদন্ত চলি আছে। কিছুদিন তেওঁ মানসিক চাপত আছিল বুলি জানিব পৰা গৈছে। কিন্তু সেই মানসিক চাপৰ কাৰণ কি আছিল, এই তথ্য পোৱা নাই।
সুধীৰ বাৰ্মাই ২০১৩ চনত অভিনয়ৰ ক্ষেত্ৰখনত ভৰি দিয়ে। তেওঁৰ প্ৰথম ছবিখনৰ নাম আছিল ‘স্বামী ৰা ৰা’। কিন্তু ২০১৬ চনত মুক্তি পোৱা ‘কুন্দনাপু বম্মা’ৰ পৰা তেওঁ সৰ্বাধিক প্ৰশংসা লাভ কৰিছিল। এই ছবিখনে তেওঁক বিখ্যাত কৰি তুলিছিল। কিন্তু ইয়াৰ পাছতো এই আটাইকেইটা বছৰত তেওঁৰ কেৰিয়াৰ মন্থৰ গতিত আগবাঢ়িছিল। খবৰ অনুসৰি তেওঁ ভাল অফাৰো পোৱা নাছিল আৰু ইয়াৰ বাবেই তেওঁৰ মানসিক চাপ বাঢ়িছিল। বিষাক্ত দ্ৰব্য খাই আত্মহত্যাৰ পথ বাচি লয় অভিনেতাগৰাকীয়ে।
