শ্বাহৰুখ খানৰ 'পাঠানে'ই ভৰসা! 'পাঠান'ৰ হাত ধৰিয়েই দুৱাৰ খোল খাব কোভিডৰ পিছত বন্ধ হোৱা দেশৰ বহু ছবি ঘৰৰ, ভাত মুকলি হ’ব কৰ্মচাৰীৰ

হিন্দুত্ববাদী সংগঠনে ছবি খনৰ নিগেটিভ প্ৰচাৰহে চলালে বুলিও বহুতে আলোচনা কৰিছে৷  কোভিড অতিমাৰীৰ পিছত সমগ্ৰ দেশতে বন্ধ হৈ থকা বহুতো চিনেমা হলে এই ছবিখনৰ জৰিয়তেই পুনৰ আশাৰে দুৱাৰ মুকলি কৰিব।  হলৰ মালিকসকলেও  শ্বাহৰুখ-দীপিকা যুটিক বিশ্বাস কৰে৷ তেওঁলোকৰ বিশ্বাস বহুদিন বন্ধ কৰি ৰখা ছবিঘৰ খোলাৰ পিছতে তেওঁলোকৰ হাতলৈয়ো দুটকা আহিব৷ অনাদায় হৈ থকা কৰ্মচাৰীৰ দৰমহা অলপ হ’লেও দিব পাৰিব, কৰ্মহীন হৈ পৰা কৰ্মচাৰীসকলেও পুনৰ কামত যোগদান কৰাৰ সুযোগ পাব৷  পূৰ্বে শ্বাহৰুখ-দীপিকাৰ  'ওম শান্তি ওম', 'চেন্নাই এক্সপ্ৰেছ', 'হেপ্পী নিউ ইয়েৰ'  হিট হৈছিল । 

গতিকে হলৰ মালিকসকল এইবাৰো পৰম আশাবাদী৷  কোভিডৰ সময়ত বন্ধ হৈ পৰা উত্তৰ প্ৰদেশৰ দহটা হল, ৰাজস্থানৰ সাতটা, মহাৰাষ্ট্ৰত দুটা, গোৱাত এটা, মধ্য প্ৰদেশত দুটা, ছত্তীশগড়ত এটা কৈ আৰু উত্তৰাখণ্ডত এটাকৈ হলৰ দুৱাৰ   দৰ্শকৰ বাবে 'পাঠান'ৰ জৰিয়তেই পুনৰ  মুকলি কৰা হ’ব৷।

ৰাজস্থানত কোভিডৰ পিছত প্ৰথমবাৰৰ বাবে মুকলি কৰিবলগীয়া হলবোৰ হৈছে কহিনুৰ চিনেমা (চুৰাটগড়), জেম চিনেমা (জয়পুৰ), গীতা টকিজ (হিদুয়া), সঙ্গম চিনেমা (খাণ্ডেলা), ড্ৰীমলাইট চিনেমা (সুজনগড়), প্ৰকাশ টকিজ (নৱালগড়), জেআৰচি চলচ্চিত্ৰ প্ৰাসাদ (ফতেহপুৰ)। উত্তৰ প্ৰদেশত মুকলি  হ’ব জ্ঞান চিনেমা (মহামাদাবাদ), কাৰ্নিভাল টিজিপ চিনেমা (নয়ডা), পিডিআৰ চিনেমা (বাৰাণসী), এম চিনেমা (বিন্দকী), কবিতা চিনেমা (লোনি), ৰামা চিনেমা (জৌনপুৰ), চিনেছিন চিনেমা (তিব্ৰামৌ), জেছি পেলেচ চিনেমা (বদৌন), কপিল চিনেমা (মাৱানা), মধুবন চিনেমা (দাসনা), ৰাজকৰণ চিনেমা (এলাহাবাদ) ।মধ্য প্ৰদেশত মুকলি হ’ব  প্ৰভাত টকিজ (বীণা), জ্যোতি চিনেমা (ইন্দোৰ) । মহাৰাষ্ট্ৰত কাৰ্নিভাল আৰু মল (মুলুন্দ মুম্বাই), প্ৰভাৰ টকিজ (গণ্ডিয়া) মুকলি হ’ব। গোৱাত চিনেকামলা (পণ্ডা), ছত্তীশগড়ৰ লাজৱন্তী টকিজ (বিশ্ৰামপুৰ) আৰু উত্তৰাখণ্ডৰ এছজিএল হেৰিটেজ চিনেমা (আলমোৰা) মুকলি হ’ব শ্বাহৰুখ খানৰ ছবিখনৰ প্ৰদৰ্শনেৰে৷ 

'পাঠান' ছবি খনে  বক্স অফিচত ধুমুহাৰ সৃষ্টি কৰিবলৈ গৈ থকা বুলি ইতিমধ্যে অনুমান কৰা হৈছে৷  ছবিখনে  টিকটৰ   আগতীয়া বুকিঙত অভিলেখ গঢ়িছে। বক্স অফিচ বিশেষজ্ঞ তৰণ আদৰ্শৰ মতে দেওবাৰে আবেলিলৈকে 'পাঠান'ৰ  তিনি লাখতকৈও অধিক টিকট বুক কৰা হৈছে। সূত্ৰ অনুসৰি ইতিমধ্যে ১৪.৬৬ কোটি টকাৰ টিকট বিক্ৰী  হৈছে। ইয়াৰ ভিতৰত দিল্লীতেই ১.৭৯কোটি টকা টিকট বিক্ৰী হৈছে৷মুম্বাইত ১.৭৪ কোটি টকাৰ টিকট বিক্ৰী হৈছে।