মানুহৰ কামোৰত সাপৰ মৃত্যু! এটা শিশুৱে কামুৰি হত্যা কৰিলে এডাল সাপ, ক’ত?

ডিজিটেল ডেস্কঃ মানুহৰ কামোৰত মৃত্যু হ’ল এডাল বিষাক্ত সাপৰ! হয়, এনেধৰণৰ এটা আজৱ ঘটনা সংঘটিত হৈছে ছত্তিশগড়ত। ৮ বছৰীয়া এটি শিশুৱে কামোৰাৰ পাছতে মৃত্যু হয় সাপডালৰ।

জানিব পৰামতে, ছত্তিশগড়ৰ ৰাজধানী ৰায়পুৰৰ পৰা ৩০০ কিলোমিটাৰ দূৰত্বৰ পণ্ডৰপধ জিলাৰ নাগলোক নামৰ গাওঁখনত সংঘটিত হৈছে এই ঘটনাটো। গাঁওখনৰ নাম 'নাগলোক’ এইবাবেই যে তাত ২০০ বিধ প্ৰজাতিৰ বিষাক্ত সাপে বাস কৰে।

সমগ্ৰ ঘটনাটো  এনেধৰণৰ- ৮ বছৰীয়া শিশুটি নিজৰ ঘৰৰ পাচফালে খেলি আছিল। সেইসময়তে তাক এডাল ফেটি সাপে খোঁট মাৰে। কেৱল কামোৰাই নহয়, শিশুটিৰ এখন হাতেৰে সাপডাল গালৈও উঠিছিল।

শিশুটিৱেও সাপডালক গাৰ পৰা আঁতৰাই দলিয়াই দিবলৈ চেষ্টা কৰে। সাপডালক সি কামোৰো মাৰে। তেতিয়াই তৎক্ষণাৎ মৃ্ত্যু হয় সাপডালৰ।

স্থানীয় সংবাদমাধ্যমক শিশুটিয়ে কোৱামতে, সাপডালে তাৰ হাতত উঠি আহিছিল আৰু সি খুব দুখ পাইছিল। তেতিয়াই সি সাপডালৰ গাত দুবাৰ কামোৰ মাৰে। তাৰপাছতে সাপডালৰ মৃত্যু হয়।

শিশুটিক সাপডালে কামোৰ মৰাৰ পাছত অৱশ্যে সি সুস্থভাৱেই আছে। সাপডালে তাক কোনো আক্ৰমণ কৰিবলৈ কামোৰা নাছিল। সেয়ে প্ৰাথমিক চিকিৎসা কৰাৰ পাছতে শিশুটিক বিপদমুক্ত ঘোষণা কৰা হয়।