ডিজিটেল ডেস্কঃ পঞ্জাৱত অনুষ্ঠিত হৈ যোৱা বিধানসভা নিৰ্বাচনত লাভ সিং উগোকে(Labh Singh Ugoke) নামৰ যুৱ নেতাজন চৰ্চালৈ আহিছিল। লাভ সিঙে (৩৫) ভাদাউৰ আসনৰ পৰা পঞ্জাৱৰ মুখ্যমন্ত্ৰী চৰণজিৎ সিং চান্নীক পৰাস্ত কৰি সকলোকে আচৰিত কৰি তুলিছিল। তেওঁৰ নাম সোমবাৰে আকৌ এবাৰ চৰ্চালৈ আহিল। ২২ বছৰৰ পিছত নিজৰ বিদ্যালয়ত উপস্থিত হৈছিল লাভ সিং উগোকে। এই বিদ্যালয়ৰ এক উদ্বোধনী অনুষ্ঠানত তেওঁক ফিটা কাটিবলৈ মুখ্য অতিথি হিচাপে আমন্ত্ৰণ কৰা হৈছিল।
সেয়া এক অতি আৱেগিক মুহূৰ্ত আছিল কিয়নো লাভ সিং উগোকেৰ মাতৃ বলদেৱ কৌৰ সেইখন বিদ্যালয়ৰে এগৰাকী চাফাই কৰ্মী।বিদ্যালয়ত কাৰ্যসূচী চলি আছিল। পুত্ৰ মুখ্য অতিথি হিচাপে উপস্থিত আছিল আৰু মাতৃয়ে বিদ্যালয়খন পৰিষ্কাৰ কৰাত ব্যস্ত আছিল। তেওঁ আনকি তেওঁৰ পুত্ৰক যঁচা সন্মান চাবলৈও যোৱা নাছিল। অনুষ্ঠানটো শেষ হোৱাৰ পাছতহে লাভ সিং উগোকেই নিজেই মাতৃৰ ওচৰলৈ গৈ ফটো তুলিছিল।
মাতৃৰ সন্দৰ্ভত বিধায়ক লাভ সিঙে কয় "মোৰ মাৰ উপাৰ্জনে পৰিয়ালটোক সহায় কৰিছিল। মই সৰু থাকোতে মোৰ মাৰ উপাৰ্জন পৰিয়ালটোৰ বাবে উপাৰ্জনৰ এটা ডাঙৰ উৎস আছিল। তেওঁৰ সামান্য উপাৰ্জনে ঘৰখন চলাবলৈ যথেষ্ট সহায় কৰিছিল। এতিয়া মোৰ মাৰ সিমান আৰ্থিক দায়িত্ব নাই, এগৰাকী এমএলএ হিচাপে মই দৰমহা পাম আৰু মোৰ পত্নীয়ে কাপোৰ চিলাই কৰি উপাৰ্জন কৰে কিন্তু মোৰ মায়ে নিজৰ কাম এৰিব নিবিচাৰে।
লাভ সিঙৰ মাতৃয়ে কয় "আমি দুয়ো নিজৰ কামক লৈ সুখী। মোৰ পুত্ৰ বিধায়ক হোৱা স্বত্বেও মই চুইপাৰ হিচাপে কাম কৰাত কোনো সমস্যা পোৱা নাই। তেওঁ তেওঁৰ কাম কৰিব আৰু মই মোৰ কাম কৰিম।" এনে বিশাল চিন্তাধাৰাৰ বাবে সকলোৱে মাতৃ-পুত্ৰক প্ৰশংসাৰে উপচাই দিছে।
Continue Reading
