ডিজিটেল ডেস্কঃ 'দ্য কেৰালা ষ্টৰী' ছবি খনকলৈ দেশৰ বিভিন্ন প্ৰান্ত বিতৰ্কৰ সূত্ৰপাত হৈ আছে। বহুতে ছবি খনৰ মুক্তি বন্ধ কৰিবলৈ ন্যায়ালয়ৰ দ্বাৰস্থ পৰ্যন্ত হৈছে। এনে সময়তে যশস্বী সুৰকাৰ এ আৰ ৰহমানে ছ'চিয়েল মিডিয়াত এটা ভিডিঅ' শ্বেয়াৰ কৰিছে। ভিডিঅ'টোত কেৰালাৰ এটা মছজিদত এহাল হিন্দু যুৱক-যুৱতীয়ে বিবাহপাশত আবদ্ধ হোৱা দেখা গৈছে।
প্ৰখ্যাত সংগীতজ্ঞগৰাকীয়ে ভিডিঅ’টোৰ শিৰোনাম দিছে 'আন এক কেৰালা কাহিনী' বুলি। ভিডিঅ' শ্বেয়াৰ কৰি তেওঁ লিখিছে, "মানৱতাৰ প্ৰতি প্ৰেম চৰ্তহীন হ'ব লাগিব। ' ভিডিঅ’ ক্লিপটোত, কেৰালাৰ আলাপুঝা চহৰৰ এটা মছজিদৰ ভিতৰত এহাল হিন্দু যুৱক-যুৱতীয়ে বিবাহপাশত আবদ্ধ হোৱা দেখা গৈছে। আৰ্থিক কাৰণতে কইনাৰ মাতৃয়ে নিজ কন্যাক ধুম-ধামেৰে বিয়া দিয়াৰ সামৰ্থ নাছিল। সেয়ে তেওঁ মছজিদ সমিতিৰ কাষ চাপিছিল।
অৱশেষত মছজিদৰ ভিতৰতে বিবাহ অনুষ্ঠান অনুষ্ঠিত হৈছিল।'দ্য কেৰালা ষ্টৰী' ছবি খনকলৈ হৈ থকা হৈ-চৈৰ মাজতে এ আৰ ৰহমানে শ্বেয়াৰ কৰা ভিডিঅ’টোৱে ধৰ্মীয় সম্প্ৰীতিৰ কথা পুনৰবাৰ মানুহক সোঁৱৰাই দিছে বুলি বহুতে আলোচনা কৰিছে।
উল্লেখ্য 'দ্য কেৰালা ষ্টৰী' ছবিখনৰ ট্ৰেইলাৰ মুকলি হোৱাৰ পিছতে বিতৰ্কৰ সূত্ৰপাত হৈছে। ট্ৰেইলাৰ অনুসৰি কেৰালাৰ পৰা ৩২,০০০ মহিলা সন্ধানহীন হৈছিল, যিসকলে পিছত আইছিছত যোগদান কৰিছিল। কেৰালাৰ মুখ্যমন্ত্ৰী পিনাৰাই বিজয়নে সংঘ পৰিয়ালৰ বিৰুদ্ধে এনে ছবিৰ জৰিয়তে কেৰালাৰ ধৰ্মনিৰপেক্ষ পৰিৱেশ ধ্বংস কৰাৰ চেষ্টা চলোৱাৰ অভিযোগ উত্থাপন কৰিছে।
কেৰালা চৰকাৰ আৰু কংগ্ৰেছেও ৰাজ্যখনত ছবিখনৰ বিৰুদ্ধে নিষেধাজ্ঞা জাৰি কৰাৰ পোষকতা কৰিছে। কংগ্ৰেছৰ নেতা শশী থাৰুৰেও ছবিখনৰ নিৰ্মাতাসকলক তীব্ৰ সমালোচনা কৰিছে। তেওঁ কৈছে "ছবি খনত বাস্তৱতাক ভুলকৈ উপস্থাপন কৰা হৈছে। বাক স্বাধীনতাৰো অপব্যৱহাৰ কৰা হৈছে।"
Continue Reading
