ডিজিটেল ডেস্কঃ নিজৰ কন্যা আৰু ভগ্নীক সুৰাপায়ীৰ লগত বিয়া নিদিবলৈ আহ্বান জনাইছে কেন্দ্ৰীয় গৃহ নিৰ্মাণ আৰু নগৰ পৰিক্ৰমা ৰাজ্যিক মন্ত্ৰী কৌশল কিশোৰে। মদ্যপান কৰা ডাঙৰ বিষয়াতকৈ ৰিক্সাচালক বা মজদুৰ এজনেই ভাল দৰা বুলি কয় কৌশল কিশোৰে। শনিবাৰে লাম্ভুৱা বিধানসভা সমষ্টিত নিচামুক্তকৰণ সম্পৰ্কীয় এক কাৰ্যসূচীত ভাষণ দি কিশোৰে কয়, “এজন সুৰাপায়ীৰ আয়ুস অতি কম।”
নিজৰ ব্যক্তিগত অভিজ্ঞতাৰ উদ্ধৃতি দি তেওঁ কয়, "মই সাংসদ হিচাপে আৰু মোৰ পত্নীয়ে বিধায়ক হিচাপে আমাৰ পুত্ৰৰ জীৱন ৰক্ষা কৰিব নোৱাৰিলোঁ যেতিয়া সাধাৰণ জনতাই কেনেকৈ কৰিব। তেওঁ কয়, ‘মোৰ ল’ৰা আকাশ কিশোৰ বন্ধু-বান্ধৱীৰ সৈতে মদ খোৱাৰ প্ৰতি আসক্ত আছিল। তেওঁক ডি-এডিকচন চেণ্টাৰত ভৰ্তি কৰা হৈছিল। বেয়া অভ্যাস ত্যাগ কৰিব বুলি ভাবি ছমাহৰ পাছত তেওঁৰ বিয়া পাতিও দিয়া হ’ল। অৱশ্যে বিয়াৰ পাছত পুনৰ মদ্যপান কৰিবলৈ আৰম্ভ কৰে আৰু শেষত মোৰ ল'ৰাটোৰ মৃত্যু হয়। ২০১৯ চনত আকাশৰ মৃত্যুৰ সময়ত আকাশৰ পুত্ৰৰ বয়স মাত্ৰ দুবছৰহে আছিল।
কৌশল কিশোৰে সভাত লগতে কয় যে “মই মোৰ পুত্ৰক বচাব নোৱাৰিলোঁ, যাৰ বাবে তেওঁৰ পত্নী আৰু আমাৰ বোৱাৰী বিধৱা হৈ পৰিল। আমাৰ কন্যা আৰু ভগ্নীসকলক ইয়াৰ পৰা বচাব লাগিব।" মন্ত্ৰীগৰাকীয়ে কয় যে, "স্বাধীনতা আন্দোলনত ৯০ বছৰৰ ভিতৰত ব্ৰিটিছৰ সৈতে যুঁজি ৬.৩২ লাখ লোকে প্ৰাণ আহুতি দিছিল, আনহাতে প্ৰতি বছৰে প্ৰায় ২০ লাখ লোকৰ মৃত্যু হয় ড্ৰাগছ আসক্তিৰ বাবে।"
উত্তৰ প্ৰদেশৰ মোহনলালগঞ্জ লোকসভা সমষ্টিৰ সাংসদগৰাকীয়ে লগতে কয় যে প্ৰায় ৮০ শতাংশ কৰ্কট ৰোগত মৃত্যু হোৱা লোক ধঁপাত আৰু চিগাৰেটৰ প্ৰতি আসক্ত। তেওঁ ৰাইজ আৰু অন্যান্য সংগঠনসমূহক নিচামুক্ত কাৰ্যসূচীৰ অংশ হ’বলৈ আৰু নিজৰ পৰিয়ালক বচাবলৈ আহ্বান জনায়। জিলাখনক ড্ৰাগছমুক্ত কৰাৰ উদ্দেশ্যে সকলো বিদ্যালয়তে ড্ৰাগছ মুক্ত অভিযান আৰম্ভ কৰাৰ লগতে শিশুসকলক পুৱাৰ প্ৰাৰ্থনাৰ সময়ত এই বিষয়ে সজাগ কৰা উচিত বুলি উল্লেখ কৰে মন্ত্ৰীগৰাকীয়ে।
Continue Reading
