মধ্য প্ৰদেশত হিংসাত্মক ঘটনা: ১২ জনক আটক

ডিজিটেল ডেস্ক: বিশ্ব হিন্দু পৰিষদৰ এটা সমদলৰ পাছত ওলোৱা এটা উৰা বাতৰিক কেন্দ্ৰ কৰি মধ্য প্ৰদেশৰ এখন চহৰত হিংসাত্মক পৰিস্থিতিৰ সূত্ৰপাত হয়৷ এই ঘটনাৰ পাছত ৩০জনৰ বিৰুদ্ধে ৰুজু হৈছে গোচৰ আৰু আটক কৰা হৈছে ১২জন ব্যক্তিক৷ বিগত ২৩ ডিচেম্বৰৰ সন্ধিয়া প্ৰায় ৫ বজাত মধ্য প্ৰদেশৰ মানাৱাৰৰ সিন্ধানা ৰোড আৰু নালা প্ৰাংগণ অঞ্চলত হিংসাত্মক ঘটনা সংঘটিত হোৱাৰ খবৰ পোৱা গৈছিল, যেতিয়া বিশ্ব হিন্দু পৰিষদ আৰু অন্যান্য সহযোগী সংগঠনৰ দ্বাৰা উলিওৱা শৌৰ্যযাত্ৰাটো প্ৰায় এক কিলোমিটাৰ দূৰত মুছলমান অধ্যুষিত অঞ্চল গান্ধী নগৰৰ মাজেৰে পাৰ হৈ গৈ আছিল।

ধাৰ জিলাৰ আৰক্ষী অধীক্ষক আদিত্য প্ৰতাপ সিঙে এক ৰাষ্ট্ৰীয় সংবাদ মাধ্যমক জনাই যে, গান্ধী নগৰৰ পৰা ১০০ মিটাৰ দূৰত যাত্ৰাত থকাসকলৰ মাজত তেওঁলোকে কঢ়িয়াই অনা লাউড স্পীকাৰৰ প্ৰতি লক্ষ্য ৰাখি কি পথ ল’ব লাগিব সেই বিষয়ে কিছু আলোচনা হৈছিল। পথটো পূৰ্বনিৰ্ধাৰিত আছিল কিন্তু সমদলটোত নতুন লোকসকলে এটা সংকীৰ্ণ পথ ল’বলৈ চেষ্টা কৰিছিল আৰু তেওঁলোকৰ মাজত এটা আলোচনা (এটা নতুন পথৰ বিষয়ে) হৈছিল। কিন্তু, কেনেবাকৈ সেই কথাটোৱেই সাম্প্ৰদায়িক সংঘৰ্ষৰ বিষয়ে উৰাবাতৰি কঢ়িয়াই আনিছিল, যিহেতু যাত্ৰাটো সমাপ্ত হৈছিল। ইয়াৰ ফলত চহৰখনৰ আন এটা অংশত শিলগুটি নিক্ষেপ আৰু কিছু হিংসাত্মক ঘটনা সংঘটিত হৈছিল বুলি আৰক্ষী অধীক্ষকগৰাকীয়ে মন্তব্য কৰিছে৷

উপ-আৰক্ষী অধীক্ষক ধীৰাজ বব্বৰৰ মতে, শৌৰ্যযাত্ৰাত প্ৰায় ৫,০০০ লোকে অংশগ্ৰহণ কৰিছিল৷ তেওঁ কয় যে, এইটো বিবেচনা কৰা হৈছিল যে সমদলটোৰ আয়োজকসকলে পূৰ্ব নিৰ্ধাৰিত পথৰ বিপৰীতে সমদলটো সমাপ্ত কৰিবলৈ এটা চুটি পথ লোৱাৰ সিদ্ধান্ত লৈছিল। আনহাতে, নাম প্ৰকাশত অনিচ্ছুক এজন স্থানীয় প্ৰত্যক্ষদৰ্শীৰ মতে, আৰক্ষীয়ে বল প্ৰয়োগ কৰি সমদলৰ ভিৰ নিয়ন্ত্ৰণ কৰিবলৈ চেষ্টা কৰিছিল, যাৰ ফলত অঞ্চলটোত সাম্প্ৰদায়িক সংঘৰ্ষৰ উৰাবাতৰি ওলাইছিল।

আৰক্ষী বিষয়া বব্বৰে সমদলৰ ভিৰ নিয়ন্ত্ৰণ কৰিবলৈ আৰক্ষীৰ দ্বাৰা লাঠীচাৰ্জৰ প্ৰসংগ অস্বীকাৰ কৰিছে৷ আন এগৰাকী উচ্চপদস্থ আৰক্ষী বিষয়াৰ মতে, অভিযুক্তসকলে ৰাস্তাত ৰখাই থোৱা বাহনসমূহত অপ্ৰৰোচিতভাৱে শিলগুটি নিক্ষেপ কৰিছিল আৰু চহৰৰ আন এটা অংশত মহিলাসহ লোকসকলক আঘাত কৰিছিল, অথচ তেতিয়ালৈ যাত্ৰা শান্তিপূৰ্ণভাৱে সমাপ্ত হৈছিল। ইতিমধ্যে, ভুক্তভোগীসকলৰ অভিযোগৰ ওপৰত ভিত্তি কৰি গোচৰ ৰুজু কৰা হৈছে আৰু ভিডিঅ’ ফুটেজৰ আধাৰত গ্ৰেপ্তাৰ কৰা হৈছে। অস্থিৰতাৰ সৃষ্টি কৰা এই হিংসাত্মক ঘটনাবোৰ সোঁপন্থী সংগঠনবোৰে উলিয়াই অনা সমদলৰ পৰা প্ৰায় ১ কিলোমিটাৰ দূৰত আন এটা এলেকাত সমান্তৰালভাৱে সংঘটিত হৈছিল বুলি পতিদাৰে কয়।

ধাৰ আৰক্ষীয়ে গোটেই গোচৰটোৰ সন্দৰ্ভত তিনিখন এজাহাৰ পঞ্জীয়ন কৰিছে। প্ৰথম এজাহাৰখন হৈছে সংঘৰ্ষ, অশ্লীল শব্দ ব্যৱহাৰ কৰা আৰু হত্যাৰ চেষ্টা কৰা, এজন ভুক্তভোগী পংকজ কুশৱাহাৰ (৩৬) অভিযোগত কোৱা হৈছে যে, ১২ জন লোকে তেওঁৰ ঘৰত প্ৰৱেশ কৰি আৰু হত্যাৰ ভাবুকি দিছিল৷ সেই অঞ্চলৰ এগৰাকী ব্যৱসায়ী নীৰজ আগৰৱালৰ দোকানত শিলগুটি নিক্ষেপ আৰু ইয়াৰ বাহিৰত ৰখাই থোৱা বাহনসমূহৰ ক্ষতিৰ অভিযোগত দ্বিতীয়খন এজাহাৰ পঞ্জীয়ন কৰা হৈছিল। তৃতীয় এজাহাৰখন চৰকাৰী বিষয়াসকলক তেওঁলোকৰ কৰ্তব্যৰ সময়ত হোৱা বাধাৰ অভিযোগত আৰক্ষীৰ অভিযোগত দাখিল কৰা হৈছিল।

মানাৱাৰৰ এজন বাসিন্দাই নাম প্ৰকাশ নকৰিবলৈ অনুৰোধ জনাই সংবাদ মাধ্যমৰ সন্মুখত কয় যে কুশৱাহাৰ ভগ্নীয়েই নালা প্ৰাংগনৰ ওচৰত থিয় হৈ থকা লোকসকলক চিত্ৰগ্ৰহণ কৰিবলৈ তেওঁৰ মোবাইল ফোন ব্যৱহাৰ কৰি আছিল। যেতিয়া তেওঁলোকে আপত্তি উত্থাপন কৰিছিল, তেতিয়া এক বিবাদ আৰম্ভ হৈছিল। কিন্তু আৰক্ষীয়ে কেৱল মুছলমান লোকসকলৰ বিৰুদ্ধেহে এজাহাৰ পঞ্জীয়ন কৰিছে বুলি স্থানীয় বাসিন্দাজনে মন্তব্য কৰিছে৷

তিনিখন পৃথক এজাহাৰৰ সন্দৰ্ভত, ধাৰ আৰক্ষীয়ে ৰাস্তা আৰু দোকানৰ বাহিৰৰ এলেকাৰ ফুটেজৰ আধাৰত ৩০ জন লোকক চিনাক্ত কৰিছে য’ত পুৰুষৰ দলবোৰে শিল ব্যৱহাৰ কৰি বাহনৰ ক্ষতি কৰা দেখা গৈছিল।
ধাৰৰ শ্বেহৰ-ই-কাজী, জামিল চিদ্দিকীয়ে গোচৰ সংক্ৰান্তত আৰক্ষী অধীক্ষকক সাক্ষাৎ কৰি কয় যে, দুয়োফালৰ পৰা অস্থিৰতা আৰু শিলগুটি নিক্ষেপ কৰা হৈছিল। আমি আৰক্ষীৰ সৈতে আছোঁ আৰু অপৰাধীসকলক গ্ৰেপ্তাৰ কৰাতো বিচাৰো কিন্তু আৰক্ষীৰ পদক্ষেপ পক্ষপাতহীন হ’ব লাগে। আমি এছপি ধৰৰ লগতে আইজি ইন্দোৰক সাক্ষাৎ কৰিছোঁ আৰু কথা পাতিছোঁ, আৰক্ষীয়ে আমাক আশ্বাস দিছে যে আৰক্ষীৰ পদক্ষেপ পক্ষপাতহীন হ’ব কিন্তু এতিয়ালৈকে এফআইআৰত অভিযুক্ত আৰু গ্ৰেপ্তাৰ হোৱা সকলো মুছলমান সম্প্ৰদায়ৰ।

ইফালে, শনিবাৰে পুৱা ধাৰ জিলা প্ৰশাসনে খলিল খাত্ৰীৰ এটা তিনিমহলা ঘৰ ভাঙি পেলায়, য’ত অভিযুক্তসকলৰ ৩ জন বাস কৰাৰ তথ্য পোৱা গৈছিল৷ খলিল খাত্ৰীয়ে কয়, তেওঁলোকে (ধাৰ প্ৰশাসনে) শুকুৰবাৰে নিশা মোক এখন জাননী প্ৰদান কৰিছিল, মোৰ ঘৰটো আইনী বুলি দেখুওৱা নথি-পত্ৰ উপস্থাপন কৰিবলৈ মোক ২৪ ঘণ্টা সময় দিছিল নহ’লে ইয়াক মাটিত পেলাই দিয়া হ’ব। মই মোৰ নামত থকা ৰেজিষ্ট্ৰী ডকুমেণ্টখন লৈ তেওঁলোকৰ ওচৰলৈ দৌৰি গৈছিলোঁ৷ কিন্তু ভৱনৰ অনুমতি নাছিল, যাৰ বাবে তেওঁলোকে মোৰ দোষ নোহোৱা সত্ত্বেও মোৰ ঘৰটো ভাঙি পেলাইছিল৷ তেওঁ লগতে কয় যে, মই অতিৰিক্ত এছপি আৰু এছডিএমৰ সন্মুখত অনুৰোধ কৰি তেওঁলোকক ধ্বংসকাৰ্য বন্ধ কৰিবলৈ কৈছিলোঁ আৰু যদি কোনো উপায় আছিল৷ কিন্তু তেওঁলোকে অপৰাধীসকলক আশ্ৰয় দিয়াৰ বাবে মোক দোষাৰোপ কৰিছিল। মই কেনেকৈ জানিব লাগিছিল যে তেওঁলোকে শিলগুটি নিক্ষেপ কৰা বা আন কিবা কামত লিপ্ত হ’ব, তেওঁলোক কেৱল মোৰ ভাৰাতীয়াহে আছিল৷

মানাৱাৰৰ উপ-বিভাগীয় দণ্ডাধীশ (এছডিএম) শিৱাংগী জোহচিয়ে শনিবাৰে সাংবাদিকৰ সৈতে বাৰ্তালাপ কৰি কয়, দুদিন আগতে মানাৱাৰৰ শান্তি বিঘ্নিত কৰাৰ চেষ্টা কৰা হৈছিল। এই নিৰ্মাণ (খাত্ৰীৰ ভৱন) অবৈধ আছিল আৰু আমাৰ ওচৰত অবৈধ কাৰ্য-কলাপৰ তথ্য আছিল। তেওঁৰ ঘৰত অস্ত্ৰ-শস্ত্ৰও পোৱা গৈছিল আৰু সেয়েহে তেওঁৰ সম্পত্তি ভাঙিবলৈ কঠোৰ ব্যৱস্থা গ্ৰহণ কৰা হৈছিল। এছডিএমে দৃঢ়তাৰে কৈছিল যে আন অভিযুক্তৰ বিৰুদ্ধে একেধৰণৰ ধ্বংসৰ ব্যৱস্থা লোৱাৰ নিৰ্দেশ দিয়া হৈছে। আমি তেওঁলোকৰ বিষয়ে তথ্য পোৱাৰ লগে লগে, ব্যৱস্থা লোৱা হ'ব৷

উল্লেখযোগ্য যে, ২০১৬ চনতো মানাৱাৰত একেধৰণৰ হিংসাত্মক ঘটনা সংঘটিত হৈছিল, যেতিয়া শৌৰ্যযাত্ৰাৰ পৰিপ্ৰেক্ষিতত চহৰখনত শিলগুটি নিক্ষেপৰ ঘটনা সংঘটিত হৈছিল। উত্তেজিত জনতাই তেতিয়া দোকান আৰু বাছ জ্বলাই দিছিল, তাৰ পাছত ভাৰতীয় দণ্ডবিধিৰ ১৪৪ ধাৰাৰ অধীনত আইন-শৃংখলা বজাই ৰখাৰ বাবে নিষেধাজ্ঞা জাৰি কৰা হৈছিল।