স্বাস্থ্যৰ পাছত সুশাসন: অসমে হেৰুৱাই গৈছে মৰ্যাদা

ডিজিটেল ডেস্ক: যেন আন এক মোক্ষম আঘাত৷ নীতি আয়োগে সৰ্বভাৰতীয় পৰ্যায়ত প্ৰকাশ কৰা স্বাস্থ্য সূচকাংকৰ প্ৰতিবেদনত অসমৰ স্থান আছিল দেশৰ ভিতৰতে দ্বাদশত৷ যাক লৈ সৰব চৰ্চা অব্যাহত আছে অসমত৷ স্বাস্থ্যখণ্ডত অসমৰ অৱনমিত স্থানৰ সময়তে কেন্দ্ৰীয় চৰকাৰে ৰাজ্যসমূহৰ মাজৰ পৰা সুশাসনৰ এক সূচী প্ৰকাশ কৰিছে৷ য’ত ১১খন ৰাজ্যৰ ভিতৰত সপ্তম স্থান লাভ কৰিছে অসমে৷ ২৫ ডিচেম্বৰত সুশাসন দিৱস উপলক্ষে ভাৰত চৰকাৰে প্ৰকাশ কৰা সুশাসনৰ ক্ষেত্ৰত উত্তৰ-পূৰ্বাঞ্চলৰ ৮খন ৰাজ্য, পাহাৰীয়া ৰাজ্য হিমাচল প্ৰদেশ, উত্তৰাখণ্ড তথা জম্মু-কাশ্মীৰসহ ১১খন ৰাজ্যৰ মাজত অসমে সপ্তম স্থানত নিজৰ সন্মান ৰক্ষা কৰিছে৷

সুশাসনৰ ক্ষেত্ৰত শীৰ্ষত আছে বৰফাবৃত হিমাচল প্ৰদেশ, লগতে দ্বিতীয় আৰু তৃতীয় স্থান ক্ৰমে মিজোৰাম আৰু উত্তৰাখণ্ডে লাভ কৰিছে৷ কৃষি আৰু সহযোগী ক্ষেত্ৰ, বাণিজ্য আৰু উদ্যোগ, মানৱ সম্পদ বিকাশ, জনস্বাস্থ্য, ৰাজহুৱা আন্তঃগাঁথনি আৰু ব্যৱস্থা, অৰ্থনৈতিক ব্যৱস্থা, সমাজ কল্যাণ আৰু বিকাশ, ন্যায়ৰ ব্যৱস্থা আৰু ৰাজহুৱা সুৰক্ষা, পৰিৱেশ তথা নাগৰিককেন্দ্ৰিক সেৱা- এই দহটা ৰাজহুৱা খণ্ডৰ ৫৮টা চৰকাৰী তথ্যৰ ওপৰত ভিত্তি কৰি এই প্ৰতিবেদন প্ৰস্তুত কৰা হৈছে৷ কৃষিপ্ৰধান ৰাজ্য হোৱা সত্ত্বেও অসমৰ কৃষি আৰু সহযোগী ক্ষেত্ৰৰ এক পৰিতাপৰ ছবি পোহৰলৈ আহিছে৷ কৃষি আৰু সহযোগী ক্ষেত্ৰসমূহৰ শিতানত উত্তৰ-পূৰ্বাঞ্চলৰ ৰাজ্যসমূহৰ ভিতৰত মিজোৰামে শীৰ্ষস্থান দখল কৰাৰ বিপৰীতে অসমে লাভ কৰিছে পঞ্চম স্থান৷ আকৌ, বাণিজ্য আৰু উদ্যোগ শিতানত উত্তৰ-পূৰ্বাঞ্চল আৰু পাহাৰীয়া ৰাজ্যসমূহৰ ভিতৰত অসমে লাভ কৰিছে চতুৰ্থ স্থান৷

আনহাতে, মানৱ সম্পদ বিকাশৰ ক্ষেত্ৰত অসমে ১১খন ৰাজ্যৰ ভিতৰত লাভ কৰিছে ষষ্ঠ স্থান৷ এই শিতানত শীৰ্ষস্থান লাভ কৰিছে হিমাচল প্ৰদেশে৷ একেদৰে, ৰাজহুৱা স্বাস্থ্যৰ ক্ষেত্ৰত অসমৰ স্থান সৰ্বনিম্ন হোৱাৰ লগতে শীৰ্ষত আছে মিজোৰাম৷ সুশাসনৰ সূচীৰ ক্ষেত্ৰত অন্য শিতানসমূহতো ক’তোৱেই শীৰ্ষস্থান পাবলৈ সক্ষম হোৱা নাই অসম৷ স্বাস্থ্য সূচকাংকৰ পৰিসংখ্যাত অসমৰ নিম্ন ফল প্ৰদৰ্শনৰ সমান্তৰালভাৱে প্ৰকাশিক সুশাসনৰ প্ৰতিবেদনত অসমে সপ্তম স্থান পোৱাক লৈ সামাজিক মাধ্যমত চৰ্চা চলা পৰিলক্ষিত হৈছে৷

যিসময়ত অসমক ভাৰতৰ শ্ৰেষ্ঠ পাঁচখন ৰাজ্যৰ ভিতৰত এখন কৰাৰ কথা কৈ আহিছে মুখ্যমন্ত্ৰী ড° হিমন্ত বিশ্ব শৰ্মাই, সেই সময়তে ক্ৰমাগতভাৱে অসমে ৰাষ্ট্ৰীয় পৰ্যায়ত শোচনীয় ফল দেখুৱাইছে৷ কেৱল মাথোঁ চমক আৰু কথাৰ ফুলজাৰিৰে অসমক শ্ৰেষ্ঠ কৰিব নোৱাৰি বুলি টিপ্পনী কৰিছে ৰাজ্যৰ বিৰোধী দলসমূহেও৷ কিয়নো, অসমত হিতাধিকাৰী সজাই চমক সৃষ্টি কৰি মৌলিক বিষয়বোৰ, ৰাজ্যৰ ব্যৱস্থাগত দুৰ্বলতাবোৰ ঢাকি ৰাখিব খোজাৰ বিপৰীতে কেন্দ্ৰীয় চৰকাৰৰ দ্বাৰাই প্ৰকাশিত এই প্ৰতিবেদনসমূহতে ৰাজ্যৰ বিকাশ আৰু উন্নতিৰ ফোপোলা স্বৰূপটোকে উন্মোচন কৰিছে৷