ডিজিটেল ডেস্কঃ বিশ্বকাপ ফুটবলৰ জ্বৰত আক্ৰান্ত হৈ পৰিছে মায়ানগৰী বলিউড। এজনৰ পাছত আনজন বলিউড তাৰকা কাটাৰ অভিমুখে ৰাওনা হৈছে। বেছিভাগ তাৰকাৰে প্ৰিয় দল আৰ্জেণ্টিনা।
বিশ্বকাপৰ ফাইনেলৰ আগমুহূৰ্তত ইনষ্টাগ্ৰামত এটা সৰু ভিডিঅ’ শ্বেয়াৰ কৰিছে অভিনেতা অৰ্জুন কাপুৰে। লিঅ’নেল মেছিৰ জাৰ্চি পৰিহিত অৰ্জুন কাপুৰক ভিডিঅ’টোত আৰ্জেণ্টিনাৰ হৈ বিজয়োল্লাস কৰা দেখা গৈছে। কেপচন হিচাপে লিখিছে- “তোমাৰ বাবে প্ৰাৰ্থনা কৰিছো মেছি। আৰু কাৰো নহয়, বিশ্বকাপ তোমাৰেই প্ৰাপ্য।”
বৰুণ ধৱনৰো প্ৰিয় ফুটবলাৰ মেছি। শেহতীয়াকৈ বৰুণে ফুটবল খেলি থকাৰ ফটো শ্বেয়াৰ কৰিছে। গাত আৰ্জেণ্টিনাৰ জাৰ্চি পিন্ধি তেওঁ সাগৰৰ পাৰত ফুটবল খেলিছে। জনাইছে যে তেওঁৰ প্ৰিয় মেছি।
শনিবাৰে ৰাতি শ্বাহৰুখ খানে ইনষ্টাগ্ৰামযোগে অনুৰাগীসকলৰ স’তে ভাৱ বিনিময় কৰে। তাত তেওঁ জনায় যে মেছি তেওঁৰ হৃদয়ত আছে। এইবাৰৰ বিশ্বকাপ মেছিয়েই জিকাটো তেওঁ বিচাৰে। কিন্তু এমবাপেৰ খেলা চাইও বেয়া নালাগে বুলি শ্বাহৰুখে জনায়।
বিশ্বকাপৰ ফাইনেল চাবলৈ বলিউডৰ কেইবাগৰাকীও তাৰকা কাটাৰলৈ ৰাওনা হৈছে। ইয়াৰ ভিতৰত দীপিকা পৰাডুকন, নোৰা ফাটেহি বিশ্বকাপৰ অনুষ্ঠানৰ স’তে জড়িত আছে। আনহাতে ৰণবীৰ সিং, কাৰ্তিক আৰিয়ান, কৰিশ্মা কাপুৰেও কাটাৰলৈ ৰাওনা হৈছে। এওঁলোকৰ প্ৰিয় দল আৰ্জেণ্টনা। প্ৰিয় দল বিজয়ী হোৱাটো বিচাৰে এওঁলোকে।
Continue Reading
