ডিজিটেল ডেস্কঃ পৰিৱৰ্তন ঘটিছে মহাৰাষ্ট্ৰৰ ৰাজনীতিত৷এন চি পিৰ নেতা অজিত পাৱাৰে দেওবাৰে (২ জুলাই) ৰাজভৱনত মুখ্যমন্ত্ৰী একনাথ সিন্দেৰ উপস্থিতিত মহাৰাষ্ট্ৰৰ উপ-মুখ্যমন্ত্ৰী হিচাপে শপত গ্ৰহণ কৰে। ইফালে এন চি পিৰ জ্যেষ্ঠ নেতা ছগন ভুজবালেও মহাৰাষ্ট্ৰৰ মন্ত্ৰী হিচাপে শপত গ্ৰহণ কৰে। শপতগ্ৰহণৰ সময়ত ৰাজভৱনত উপস্থিত আছিল উপ-মুখ্যমন্ত্ৰী দেৱেন্দ্ৰ ফাড়নাৱিছ।
মহাৰাষ্ট্ৰৰ প্ৰাক্তন গৃহমন্ত্ৰী তথা এনচিপি নেতা দিলীপ ৱালছে পাটিলেও মহাৰাষ্ট্ৰৰ মন্ত্ৰী হিচাপে শপত গ্ৰহণ কৰিছে। সংবাদ সংস্থা এএনআইৰ সূত্ৰ অনুসৰি অজিত পাৱাৰৰ লগত ৰাজভৱনলৈ যোৱা একাংশ বিধায়ক শাৰদ পাৱাৰে ৰাহুল গান্ধীৰ সৈতে মঞ্চত সহযোগিতা কৰাৰ "একপক্ষীয়" সিদ্ধান্তক লৈ আৰু পাটনাত অনুষ্ঠিত বিৰোধীৰ ঐক্য বৈঠকত তেওঁৰ সৈতে সহযোগিতা কৰাৰ বাবে বিচলিত হৈ পৰিছিল।
বিজেপিৰ মহাৰাষ্ট্ৰৰ ৰাজ্যিক সভাপতি চন্দ্ৰশেখৰ বাৱানকুলে কয় যে এন চি পিৰ অজিত পাৱাৰ আৰু তেওঁৰ সংগী নেতাসকলে আজি প্ৰধানমন্ত্ৰী মোদীৰ দৃষ্টিভংগীক সমৰ্থন কৰিবলৈ আহিছে। এই সমীকৰণ মহাৰাষ্ট্ৰক শক্তিশালী কৰিবলৈ আহি আছে। এই সমীকৰণে মহাৰাষ্ট্ৰক আৰু আগুৱাই লৈ যাব।
Continue Reading
