মহাকাশ বিজ্ঞানত উজলিছে অসমীয়া: সম্ভাৱনাৰ নতুন পোহৰ

ডিজিটেল ডেস্ক: ভাৰতীয় মহাকাশ গৱেষণা প্ৰতিষ্ঠান, চমুকৈ ‘ISRO’ত বিজ্ঞানী হিচাপে নিযুক্তিলাভ কৰিছে দুগৰাকী অসম সন্তানে৷ এই খবৰে আনন্দিত কৰি তুলিছে অসমবাসীক৷ ভাৰতীয় মহাকাশ গৱেষণা প্ৰতিষ্ঠানৰ অন্তৰ্গত অন্ধ্ৰপ্ৰদেশৰ শ্ৰীহৰিকোটাস্থিত সতীশ ধাৱান স্পেচ চেণ্টাৰত বিজ্ঞানী হিচাপে গৱেষণাৰ বাবে নিযুক্তি লাভ কৰিছে নগাঁৱৰ জীয়াৰী নাজনিন ইয়াচমিন আৰু তিতাবৰৰ অলকেশ কলিতাই৷

কালি নাজনিন ইয়াচমিনৰ খবৰ বিয়পি পৰাৰ পাছতেই ৰাজ্যজুৰি সৃষ্টি হৈছিল এক আনন্দৰ পৰিৱেশ৷ নাজনিন ইয়াচমিনৰ খবৰে সুখী কৰি ৰখাৰ মাজতে আজি আহিল আন এক সুখবৰ৷ তিতাবৰৰ ছাত্ৰ অলকেশ কলিতা নিযুক্ত হৈছে ইছৰোৰ বিজ্ঞানী হিচাপে৷ ভাৰতীয় মহাকাশ বিজ্ঞান আৰু প্ৰযুক্তি প্ৰতিষ্ঠানৰ প্ৰাক্তন ছাত্ৰ অলকেশৰ ঘৰ যোৰহাটৰ তিতাবৰত৷ ইঞ্জিনীয়াৰিং ফিজিক্সৰ স্নাতক আৰু কনডেন্সড মেটাৰ ফিজিক্সৰ স্নাতকোত্তৰ ডিগ্ৰীধাৰী অলকেশ কলিতা৷ একেদৰে, নাজনিন ইয়াছমিনৰ পিতৃগৃহ হৈছে নগাঁৱৰ জুৰীয়াত৷ ২০১৩ চনত ইলেক্ট্ৰ’নিকছ্ এণ্ড কমিউনিকেশ্যন ইঞ্জিনীয়াৰিঙত বি.টেক. আৰু ২০১৬ চনত তেজপুৰ বিশ্ববিদ্যালয়ৰ পৰা ইলেক্ট্ৰ’নিক ডিজাইন এণ্ড টেকন’ল’জীত এম.টেক. ডিগ্ৰী লাভ কৰে নাজনিনে৷ 

এই দুগৰাকী অসমীয়া শিক্ষাৰ্থীৰ সাফল্যই অসমলৈ কঢ়িয়াই আনিছে সম্ভাৱনাৰ নতুন পোহৰ৷ স্থূল ৰাজনৈতিক বাতাবৰণৰ বিপৰীতে শিক্ষা আৰু বিজ্ঞানৰ অন্বেষণৰ মাজেৰে বাট বুলা এইসকল অসমীয়াৰ হাততেই অসমীয়াৰ ভৱিষ্যৎ সুৰক্ষিত বুলি বহুজনে মন্তব্য কৰিছে৷ ধৰ্ম, সাম্প্ৰদায়িক বিভাজনৰ বিপৰীতে নাজনিন-অলকেশৰ সফলতাই পুনৰবাৰ অসমবাসীক গৌৰৱ কৰাৰ সুযোগ দিলে৷ আশা কৰিব পাৰি, এওঁলোকৰ সফলতাৰ এই জয়যাত্ৰাই অসমৰ ছাত্ৰ-ছাত্ৰীসকলক উৎসাহিত কৰিব৷ একেসময়তে, গুৰুপ্ৰসাদ দাসৰ পৰা আৰম্ভ কৰি জিতেন্দ্ৰনাথ গোস্বামী, উদ্ভৱ ভৰালী, দীনেশ চন্দ্ৰ গোস্বামীয়ে দেখুওৱা বাটৰ পথিক হৈ নাজনিন-অলকেশেও অসমত বিজ্ঞানচৰ্চা আৰু অধ্যয়নৰ নতুন পৰিৱেশ নিৰ্মাণ হ’ব বুলি আশা কৰা হৈছে৷