মহাকাশচাৰীৰ বেশ ধৰি এগৰাকী মহিলাৰ পৰা প্ৰৱঞ্চকে সৰকালে ২৪ লাখ টকা, ক’ত আৰু কেনেকৈ?

ডিজিটেল ডেস্কঃ মানুহে কি পৰ্যায়ত কাৰোবাক প্ৰৱঞ্চনা কৰিব পাৰে, তাৰ এক সুন্দৰ উদাহৰণ পোৱা গৈছে জাপানত। এজন ভুৱা মহাকাশচাৰীৰ জালত পৰি এক বৃহৎ ধনৰাশি হেৰুৱালে দেশখনৰ এগৰাকী মহিলাই। কিন্তু কেনেদৰে ভুৱা মহাকাশচাৰীজনে এই প্ৰৱঞ্চনা কৰিলে?

জাপানৰ এটা সংবাদ মাধ্যমৰ বাতৰি অনুযায়ী, উক্ত প্ৰৱঞ্চকজনে ৰাছিয়াৰ মহাকাশচাৰীৰ পোছাক পিন্ধি ইনষ্টাগ্ৰামত ফটো আপলোড কৰে। তাৰপাছতে জাপানৰ মহিলাগৰাকীৰ স’তে সঘনে যোগাযোগ কৰিবলৈ ধৰে।

মহিলাগৰাকীৰ বয়স ৬৫ বছৰ আৰু তেওঁ জাপানৰ ছিগা পাৰফেকচাৰৰ বাসিন্দা। জুন মাহত তেওঁ আৰু ভুৱা মহাকাশচাৰীগৰাকীৰ ইনষ্টাগ্ৰামত কথা-বাৰ্তা হয়। প্ৰৱঞ্চকজনে মহিলাগৰাকীক কয় যে তেওঁ এটা স্পেচ ষ্টেচনত কাম কৰে।  

মহিলাগৰাকী আৰু প্ৰৱঞ্চকজনৰ মাজত কথা-বাৰ্তা চলি থাকোতেই প্ৰেমৰ বান্ধোনত বান্ধ খায়। আনকি ৬৫ বছৰ বয়সীয়া মহিলাগৰাকীক বিয়া পতাৰো প্ৰতিশ্ৰুতি দিয়ে প্ৰৱঞ্চকজনে।

প্ৰৱঞ্চকজনে কয় যে তেওঁ জাপানত এটা নতুন জীৱন কটাব বিচাৰে। কিন্তু তেওঁ থাকে পৃথিৱীৰ বাহিৰৰ এটা স্পেছ ষ্টেশ্যনত। পৃথিৱীলৈ উভটিবলৈ তেওঁক যথেষ্ট টকাৰ প্ৰয়োজন। যদি মহিলাগৰাকীয়ে তেওঁক ৪.৪ মিলিয়ন জাপানীজ য়েন প্ৰদান কৰে, তেন্তে তেওঁ এটা ৰকেটৰ যোগেৰে মহাকাশৰ পৰা পোনে পোনে জাপানত অৱতৰণ কৰিব পাৰিব আৰু তাৰপাছতে বিবাহপাশত আৱদ্ধ হ’ব। ভাৰতীয় হিচাপত টকাখিনিৰ মূল্য ২৪.৮ লাখ।

মহিলাগৰাকীয়েও প্ৰৱঞ্চকজনক ১৯ আগষ্টৰ পৰা ৫ চেপ্টেম্বৰৰ ভিতৰত টকাখিনি দিয়ে। কিন্তু ইমানিখিনি টকা দিয়াৰ পাছতো প্ৰৱঞ্চকজনে আৰু অধিক টকা বিচাৰি মহিলাগৰাকীক ব্যতিব্য্ত কৰে। তাৰপাছতে মহিলাগৰাকীৰ মনত সন্দেহে বাহ লয়।