ডিজিটেল ডেস্কঃ মহিলা অভিযুক্তক 'কুমাৰীত্ব পৰীক্ষা’ তথা 'ভাৰ্জিনিটী টেষ্ট’ কৰাটো অসাংবিধানিক। ই লিংগবৈষম্য আৰু মৰ্যাদাৰ অধিকাৰ উলংঘাও কৰে। দিল্লী উচ্চ ন্যায়ালয়ে মঙলবাৰে এই ৰায় দিছে।
আদালতে লক্ষ্য কৰে যে কোনো উল্লেখিত ''আইনী পদ্ধতি’’ নাই য'ত "কুমাৰীত্ব পৰীক্ষা"ৰ ব্যৱস্থা কৰা হৈছে। এনে পৰীক্ষা এক প্ৰকাৰৰ অমানৱীয় ব্যৱহাৰ বুলি আদালতে কয়।
১৯৯২ চনত কেৰালাত এগৰাকী নানৰ মৃত্যুক লৈ হোৱা অপৰাধমূলক গোচৰৰ সৈতে জড়িত ভগ্নী ছেফীয়ে তেওঁৰ ওপৰত "কুমাৰীত্ব পৰীক্ষা" চলোৱাৰ বিৰুদ্ধে দিয়া আবেদনৰ ৰায়ত এইদৰে কয় আদালতে। ন্যায়াধীশ স্বৰানা কান্ত শৰ্মাই আদালতৰ এই নিৰ্দেশ গৃহীত কৰে।
ন্যায়াধীশ শৰ্মাই কয় যে- ''তদন্তৰ অধীনত অভিযুক্ত বা জিম্মাত থকা মহিলা বন্দীসকলৰ ওপৰত কৰা কুমাৰীত্ব পৰীক্ষাটো অসাংবিধানিক আৰু সংবিধানৰ ২১ নং অনুচ্ছেদ উলংঘা কৰা বুলি ঘোষণা কৰা হৈছে।’’
উল্লেখ্য যে সংবিধানৰ ২১ নং অনুচ্ছেদত মৰ্যাদাৰ অধিকাৰ অন্তৰ্ভুক্ত কৰা হৈছে।
ন্যায়াধীশগৰাকীয়ে কয় যে, ''সেয়েহে এই আদালতে এই পৰীক্ষা লিংগবৈষম্যবাদী আৰু মহিলা অভিযুক্তৰ মৰ্যাদাৰ মানৱ অধিকাৰ উলংঘা কৰা বুলি ৰায়প্ৰদান কৰে।’’
আদালতে জোৰ দি কয় যে এগৰাকী মহিলা আৰক্ষীৰ জিম্মাত থকাৰ সময়তো তেওঁৰ মৰ্যাদাৰে জীয়াই থকাৰ অধিকাৰ আছে। তেওঁৰ ওপৰত কুমাৰীত্ব পৰীক্ষা কৰাটো কেৱল তদন্তকাৰী সংস্থাই তেওঁৰ শাৰীৰিক অখণ্ডতা আৰু মানসিক স্বাস্থ্য, দুয়োটাতে হস্তক্ষেপ কৰা হয়।
উল্লেখ্য যে আবেদনকাৰীয়ে আদালতৰ সন্মুখত অভিযোগ কৰিছিল যে ২০০৮ চনত কেন্দ্ৰীয় তদন্তকাৰী সংস্থাই তেওঁক বলপূৰ্বকভাৱে “কুমাৰীত্ব পৰীক্ষা” কৰিছিল।
Continue Reading
