ডিজিটেল ডেস্কঃ লোকসভা আৰু ৰাজ্যিক বিধানসভাত মহিলাৰ বাবে ৩৩ শতাংশ আসন সংৰক্ষণৰ বাবে মহিলা সংৰক্ষণ বিধেয়ক উত্থাপন কৰে চৰকাৰে। বলীউডৰ কেইবাগৰাকীও তাৰকাই একেটা বিষয়তে নিজৰ মতামত ব্যক্ত কৰাৰ লগতে মহিলাৰ উত্থানৰ প্ৰতি চৰকাৰৰ চিন্তাশীলতাক প্ৰশংসা কৰি আহিছে।
বিধেয়কখনৰ প্ৰতি প্ৰতিক্ৰিয়া প্ৰকাশ কৰি কিংবদন্তি গায়িকা আশা ভোছলে কয়, "মহিলাসকলৰ কোনো ধাৰণাই নাই যে তেওঁলোক কিমান শক্তিশালী! উদাহৰণস্বৰূপে আজি মোৰ এটা শ্ব' আছিল আৰু ৯০ বছৰ বয়সত তিনি ঘণ্টা ধৰি গান গাইছিলোঁ। এইটোৱেই হৈছে নাৰী-শক্তি, আৰু ইয়াৰ দ্বাৰা তেওঁলোকৰ উল্লেখযোগ্য স্থিতিস্থাপকতা প্ৰকাশ পাইছে।"
গায়িকাগৰাকীয়ে শেহতীয়াকৈ ডুবাইৰ এটা অনুষ্ঠানত তিনি ঘণ্টা ধৰি গীত গাইছিল। তেওঁৰ নাতিনীয়েক জানাইও অনুষ্ঠান পৰিৱেশন কৰিছিল। চলিত বৰ্ষৰ ৮ ছেপ্টেম্বৰত ৯০ বছৰ সম্পূৰ্ণ কৰিছে ভোছলেই।
গ্ৰেমী বঁটা বিজয়ী কণ্ঠশিল্পীগৰাকীয়ে মুম্বাইস্থিত ভাৰতীয় জনতা পাৰ্টিৰ সভাপতি আশীষ শ্বেলাৰৰ বাসগৃহত গণেশ চতুৰ্থী উপলক্ষে অনুষ্ঠিত এক অনুষ্ঠানত এই মন্তব্য কৰে। তেওঁৰ লগত নাতিনীয়েক জানাই ভোছলেও আছিল।
