ডিজিটেল ডেস্কঃ উত্তৰ প্ৰদেশৰ মথুৰাত সমকামী সম্পৰ্কৰ এটা গোচৰ পোহৰলৈ আহিছে। গোৰখপুৰৰ এগৰাকী যুৱতীৰ প্ৰেমত পৰে মথুৰাৰ এগৰাকী যুৱতী। মথুৰাৰ যুৱতীগৰাকীয়ে এই কথা ঘৰত জনোৱাত ঘৰখনত হুলস্থূলৰ সৃষ্টি হয়। বিষয়টো গৈ থানা পায়গৈ। ছোৱালীজনীয়ে থানাতে নিজৰ সিদ্ধান্তৰ কথা জনায়। যুৱতীগৰাকীয়ে আন এগৰাকী যুৱতীক বিয়া পাতিব বিচৰা কথাটোত বিচলিত হৈ থানাতে মাতৃ আৰু ভাতৃয়ে আত্মহত্যাৰ চেষ্টা চলায়।
সম্প্ৰতি আৰক্ষীয়ে ছোৱালীজনী আৰু পৰিয়ালৰ লোকক পতিয়ন নিয়াবলৈ চেষ্টা অব্যাহত ৰাখিছে। মঙলবাৰে যুৱতীগৰাকী আৰু তেওঁৰ পৰিয়ালক থানালৈ মাতিছিল। থানাতে ছোৱালীজনীয়ে মাতৃ আৰু ভাতৃৰ সন্মুখত কৈছিল যে তেওঁ গোৰখপুৰৰ বাসিন্দা অঞ্জলি নামৰ ছোৱালীজনীক বিয়া কৰাব বিচাৰে আৰু তেওঁৰ লগতে থাকিব বিচাৰে।
এই কথা শুনি মাক আৰু ভায়েক দুখত ভাগি পৰে। থানাতে মাতৃ আৰু ভাতৃয়ে নিজৰ ওপৰত জ্বলনশীল সামগ্ৰী ঢালি আত্মহত্যাৰ চেষ্টা চলায়। নিজকে সমকামী বুলি বৰ্ণনা কৰি ছোৱালীজনীয়ে নিজৰ প্ৰেমৰ ওচৰলৈ যোৱাৰ ক্ষেত্ৰত অটল আছিল। আৰক্ষীয়ে বিষয়টো বুজি পৰিয়ালৰ লোকক বিষয়টো বুজাবলৈ চেষ্টা কৰি আছে।
ছোৱালীজনীৰ মাতৃয়ে আৰক্ষীক কয় যে গোৰখপুৰৰ সেই ছোৱালীজনীয়ে জীয়েকৰ জীৱন নষ্ট কৰি পেলাব।
থানাৰ ভাৰপ্ৰাপ্ত বিষয়া অনুজ ৰানাই কয় যে সকলোকে পতিয়ন নিয়াবলৈ প্ৰচেষ্টা চলোৱা হৈছে, যদিহে তেওঁলোকে একমত নহয় তেতিয়া আইনী ব্যৱস্থা গ্ৰহণ কৰা হ’ব।
Continue Reading
