মিজোৰাম আৰক্ষীৰ বৃহৎ সাফল্য! চোৰাং চিকাৰীৰ পৰা উদ্ধাৰ কৰিলে ১৪০টাকৈ প্ৰজাতিৰ বন্যজন্তু

ডিজিটেল ডেস্কঃ এটা দুটা নহয়, ১৪০ টাকৈ প্ৰজাতিৰ বন্যপ্ৰাণীৰ চোৰাং বেহা ধৰা পেলাবলৈ সক্ষম হৈছে মিজোৰাম আৰক্ষী। শনিবাৰে আৰক্ষীয়ে কৰা এই উদ্ধাৰকাৰ্যত দুষ্প্ৰাপ্য প্ৰজাতিৰ এটা আলবিন’ ৱাল্লাবীও উদ্ধাৰ কৰিছে।

আৰক্ষীসূত্ৰই প্ৰকাশ কৰা মতে, এই সম্পৰ্কত তিনিজনকৈ লোকক আটকো কৰা হৈছে। বন্যজন্তুসমূহ কাষৰীয়া ম্যানমাৰৰ পৰা চোৰাংকৈ অনা হৈছিল বুলি জানিব পৰা গৈছে। সেয়েহে চোৰাং চক্ৰটোত দুয়োখন দেশৰে লোক জড়িত বুলি আৰক্ষীয়ে সন্দেহ প্ৰকাশ কৰিছে।

দুখন বলেৰ’ আৰু এখন স্ক’ৰপিঅ’ত বন্যজন্তুসমূহ আনি থকাৰ অৱস্থাত চাম্ফাই আৰক্ষীয়ে সেইসমূহ জব্দ কৰে। বাহন দুখনত বন্যজন্তসমূহ বাকচ আৰু পিঞ্জৰাত ভৰাই অনা হৈছিল।

বন্যজন্তুসমূহৰ ভিতৰত আছে ৩০টা কাছ, দুটা বান্দৰ, ২২ডাল অজগৰ, ৫৫টা ঘঁৰিয়াল আৰু চাৰিটাকৈ বনৰীয়া মেকুৰিকে ধৰি ১৪০ টা প্ৰজাতিৰ জন্তু। আৰক্ষীয়ে সেইসমূহ উদ্ধাৰ কৰি বিভাগীয় কৰ্তৃপক্ষক চমজাই দিয়া হৈছে।

উল্লেখযোগ্য যে যোৱা মাহতো অসমত এনেোধৰণে চোৰাংকৈ কঢ়িয়াই নি থকা অৱস্থাত এটা চোৰাং চক্ৰ ধৰা পেলোৱা হৈছিল। উদ্ধাৰ কৰা হৈছিল কমেও ৪০টাকৈ বন্যজন্তু। বন্যজন্তুসমূহ ম্যানমাৰৰ পৰা ডিমাপুৰলৈ আনি থকা অৱস্থাত জব্দ হৈছিল।