ডাক্তৰে প্ৰেছক্ৰিপশ্বনত ঔষধৰ নাম লিখাৰ পূৰ্বে ‘শ্ৰীহৰি’ লিখা আৰম্ভ কৰক! মধ্যপ্ৰদেশৰ মুখ্যমন্ত্ৰীৰ উপদেশ

ডিজিটেল ডেস্কঃ ডাক্তৰে প্ৰেছক্ৰিপচনত ঔষধৰ নামসূহ লিখাৰ পূৰ্বে ‘শ্ৰীহৰি’ লিখা আৰম্ভ কৰক! এই পৰামৰ্শ আগবঢ়াইছে মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে।

চৌহানে শনিবাৰে ভূপালস্থিত ভাৰত ভৱনত অনুষ্ঠিত কৰা এটা অনুষ্ঠানত প্ৰশ্ন কৰি কয় যে প্ৰেচক্ৰিপচনত ঔষধৰ নামসমূহ কিয় হিন্দীত লিখিব নোৱাৰি? হিন্দীত লিখাত কিবা সমস্যা আছে নেকি? ঔষধসমূহ লিখাৰ আগত শ্ৰীহৰি লিখা কৰক- চৌহানে কয়।

তেওঁ কয় যে চৰকাৰ ইংৰাজী ভাষাৰ বিৰোধী নহয় কিন্তু ৰাষ্ট্ৰীয় হিচাপে হিন্দীৰ প্ৰয়োজনীয়তাৰ ওপৰতো সচেতন। ইংৰাজী শিক্ষাৰ অবিহনে যিকোনো কাম কৰিব নোৱাৰা বোলাৰ মানসিকতাটো ভুল বুলি কৈ তেওঁ কয় যে বহুতো ছাত্ৰ-ছাত্ৰীয়ে ইংৰাজী ভাষাত দুৰ্বল বাবেই মেডিকেল কলেজ ত্যাগ কৰিছে।

দেশীয় ভাষাত জোৰ দি মুখ্যমন্ত্ৰীজনে এইক্ষেত্ৰত ৰাছিয়া, জাপান, জাৰ্মানীৰ কথাও উল্লেখ কৰে। কয় যে এইসমূহ দেশে নিজৰ দেশীয় ভাষাৰেই বিজ্ঞান-প্ৰযুক্তিত আগবাঢ়ি গৈছে।

“ৰাছিয়া, জাপান, জাৰ্মানী আৰু চীনত কোনে ইংৰাজী কয়? আমি দাস হৈ পৰিছো।”- চৌহানে কয়- “যেতিয়া মই আমেৰিকা যুক্তৰাষ্ট্ৰলৈ গৈছিলো, হিন্দীত এটা ভাষণ দিছিলো আৰু ইংৰাজীত ভাষণ দিয়াসকলতকৈ বেছি প্ৰশংসা লাভ কৰিছিলো।

উল্লেখযোগ্য যে ইতিমধ্যে মধ্যপ্ৰদেশত মেডিকেল কলেজৰ পাঠ্যপুথিসমূহ হিন্দীত প্ৰণয়ন কৰিবলৈ মধ্য প্ৰদেশ চৰকাৰে সিদ্ধান্ত গ্ৰহণ কৰিছে। মুখ্যমন্ত্ৰী চৌহানে ইয়াক এটা সামাজিক আন্দোলন বুলি অভিহিত কৰিছে।