ডিজিটেল ডেস্কঃ মিজোৰামৰ লেংপুই বিমানবন্দৰত অৱতৰণ কৰাৰ ঠিক পিছতে ভাগি পৰে ম্যানমাৰৰ এখন সামৰিক বিমান।এই বিমান দুৰ্ঘটনাত কমেও আঠ জন লোক গুৰুতৰভাবে আহত হৈছে।জানিব পৰা মতে যোৱা সপ্তাহত ইণ্ডো-ম্যানমাৰ সীমান্ত অতিক্ৰম কৰি মিজোৰামত প্ৰৱেশ কৰা সৈনিকসকলক বিমানেৰে নিজৰ দেশলৈ নিয়াৰ বাবে সামৰিক বিমানখন ম্যানমাৰৰ পৰা মিজোৰামলৈ আহিছিল।
কিন্তু বিমান খনে অৱতৰণ কৰাৰ পিছতে নিয়ন্ত্ৰণ হেৰাৱাই পেলায় আৰু দুৰ্ঘটনাত পতিত হয়। এই দুৰ্ঘটনাত বিমানখনত থকা ১৩ জন কৰ্মচাৰীৰ ভিতৰত ৮ জন আঘাতপ্ৰাপ্ত হয় । ম্যানমাৰৰ সামৰিক বিমানখনে মিজোৰামৰ আইজলৰ ওচৰৰ লেংপুই বিমানবন্দৰত ম্যানমাৰ সেনাৰ ১৮৪ জন জোৱানক বিমানেৰে নিজৰ দেশলৈ নিয়াৰ বাবে আহিছিল।
ম্যানমাৰৰ সেই সেনা জোৱান কেইজনে ম্যানমাৰৰ বিদ্ৰোহীৰ আক্ৰমণ সহিব নোৱাৰি মিজোৰামত প্ৰৱেশ কৰি অঞ্চলটোত আশ্ৰয় বিচাৰিছিল। এই সৈন্যসকলে আৰাকান আৰ্মি নামৰ উগ্ৰপন্থীৰ সংগঠনৰ আক্ৰমণৰ পৰা ৰক্ষা পৰিবলৈ মিজোৰামৰ লংটলাই জিলালৈ পলাই আহিছিল। ভাৰতৰ বৈদেশিক পৰিক্ৰমা মন্ত্ৰালয় আৰু ম্যানমাৰৰ সামৰিক শাসক জুণ্টাৰ মাজত হোৱা আলোচনাৰ পিছত এই সৈনিকসকলক তেওঁলোকৰ অস্ত্ৰসহ দুটা গোটত ম্যানমাৰলৈ স্থানান্তৰ কৰাৰ সিদ্ধান্ত লোৱা হৈছিল।
Continue Reading
