ডিজিটেল ডেস্কঃ অসামান্য প্ৰদৰ্শনেৰে কাটাৰ বিশ্বকাপৰ চেমিফাইনেলত উপনীত হৈছে মৰক্কো। অনবদ্য প্ৰদৰ্শন আগবঢ়াইছে দলটোৰ তাৰকা ফুটবলাৰ আচ্ৰাফ হাকিমিয়ে। চৰ্চালৈ আহিছে হাকিমিৰ পৰিয়ালো। চৰ্চাত আছে হাকিমিৰ পত্নী তথা মডেল হিবা আবুক।
হিবা আবুকক লৈ বাংলাদেশৰ লেখিকা তছলিমা নাছৰিণে এটা বিশেষ টুইট কৰিছে। টুইটাৰত এখনি ফটো প’ষ্ট কৰিছে তছলিমাই। ফটোখনত দেখা গৈছে সম্পূৰ্ণ আধুনিক ফেশ্বনৰ সাজ পৰিধান কৰি হিবাই হাকিমিৰ কান্ধত কান্ধ মিলাই খোজকাঢ়িছে।
ফটোখনৰ স’তে তছলিমাই লিখে- “তেওঁলোকো মুছলিম কিন্তু বোৰ্খা বা হিজাবতো পিন্ধা নাই!” ইয়াৰ দ্বাৰা তছলিমাই মূলতঃ মুছলিমসকলৰ গোড়া বোৰ্খা প্ৰথাকে আক্ৰমণ কৰি লৈছে।
তছলিমাৰ টুইটটোৰ পাছতে ই ব্যাপক চৰ্চা লাভ কৰিছে। অনেকে বোৰ্খা তথা হিজাবৰ বিৰুদ্ধে বিষোদ্গাৰ প্ৰকাশ কৰিছে।
উল্লেখ্য যে কাটাৰ বিশ্বকাপত মহিলাৰ পোছাকক লৈ ব্যাপক বিতৰ্ক চলি থকা দেখা গৈছে। শেহতীয়াকৈ ইৰাণত দেখা দিয়া হিজাৱবিৰোধী আন্দোলনৰো প্ৰভাৱ পৰিছে কাটাৰত। বিশেষকৈ ইৰাণৰ ফুটবল দলটোৱে চৰকাৰৰ দমনৰ প্ৰতি প্ৰতিবাদ জনাইছে। আনহাতে, ক্ৰ’ৱেশ্চিয়াৰ মডেল ইভানা নলে কাটাৰত বিকিনি পৰিধান কৰি এই বিতৰ্কত জ্বলা জুইত ঘিউ ঢালিছে। তাৰপাছতে তছলিমাৰ দৰে এগৰাকী প্ৰভাৱশালী লেখিকাই কৰা এই টুইটটোৱে বিষয়টোক নতুন মাত্ৰা দিছে।
Continue Reading
