ডিজিটেল ডেস্কঃ মঙলবাৰে ২৯ সংখ্যক কলকাতা চলচ্চিত্ৰ মহোৎসৱত কেইবাগৰাকীও তাৰকাই শোভাবৰ্ধন কৰে। সৌৰভ গংগোপাধ্যায়, শত্ৰুঘন সিনহা, সোনাক্ষী সিনহা, মহেশ ভাট, অনিল কাপুৰে বক্তব্য ৰাখে। কিন্তু ছলমান খানৰ বক্তব্যই দৰ্শকৰ মাজত ব্যাপক হৈ চৈৰ সৃষ্টি কৰিছে।
সাধাৰণতে চলচ্চিত্ৰ মহোৎসৱলৈ অহা বিশিষ্ট অতিথিৰ গম্ভীৰ ভাষণ শুনাত দৰ্শক অভ্যস্ত। কিন্তু ছলমান খানে স্বভাৱসুলভ ব্যংগভৰা কথাৰে কয়- "মোৰ আগতে যিসকলে কথা কৈ গ’ল, তেওঁলোকে মোলৈ একো নাৰাখিলে।’’
যোৱা ১৩ মে’ত কলকাতাৰ ইষ্ট বেংগল খেলপথাৰত কনচাৰ্ট কৰিছিল ছলমানে। সেইবাৰ তেওঁ বংগৰ মুখ্যমন্ত্ৰী মমতা বেনাৰ্জীকো সাক্ষাৎ কৰে। সেই বিষয়টো স্মৰণ কৰি ছলমানে কয় যে- ''যোৱাবাৰ দিদীয়ে অনুৰোধ কৰিছিল। প্ৰতিশ্ৰুতি দি আজি ইয়ালৈ আহিছো।'' তাৰপাছত নিজৰ ছবিৰ এটা বিখ্যাত সংলাপ আঁওৰায়-, "কাৰণ এবাৰ কাৰোবাক কথা দিলে মই নিজৰ কথাও নুশুনো।’’
যোৱাবাৰ ছলমান কলকাতালৈ আহি মমতাৰ ঘৰলৈ গৈছিল। মঙলবাৰে অভিনেতাগৰাকীয়ে কয়- ''মই মাত্ৰ চাব বিচাৰিছিলো যে দিদি মোতকৈও সৰু ঘৰত থাকে নেকি। কিন্তু মই গৈ দেখিলোঁ যে সেয়া সঁচা।'' উল্লেখ্য যে দেশৰ এগৰাকী ছুপাৰষ্টাৰ হোৱাৰ পিছতো ছলমানে মুম্বাইৰ বান্দ্ৰাৰ গেলাক্সি ৰেচিডেন্সৰ এটা কোঠাৰ ফ্লেটত থাকে।
হাঁহি হাঁহি অভিনেতাজনে কয়, ‘দিদীক দেখি সঁচাকৈয়ে মোৰ ঈৰ্ষা হয়। কাৰণ মই দেখিলোঁ যে তেওঁ সঁচাকৈয়ে মোতকৈ সৰু ঘৰ এটাত থাকে। আচলতে মোৰ আৰু দিদিৰ দৰে সৰল মনৰ মানুহবোৰক জীয়াই থাকিবলৈ বেছি প্ৰয়োজন নাই।"
মঙলবাৰে উদ্বোধনী অনুষ্ঠানত মুখ্যমন্ত্ৰীৰ কাষত মঞ্চত বহিছিল ছলমান। মমতাৰ লগত কথা পতাও দেখা যায়। কিন্তু কেৱল হিন্দী নহয়, ছলমানে দৰ্শকৰ সৈতে বাংলা ভাষাতো কথা পাতিলে। মূখ্যমন্ত্ৰীয়ে যেতিয়া ছলমানক পুনৰ কলকাতালৈ আহিবলৈ অনুৰোধ কৰিছিল তেতিয়া ছলমানে প্ৰতিশ্ৰুতি দিছিল যে তেওঁ পুনৰ এই চহৰলৈ আহি ছবিৰ শ্বুটিং কৰিব। বংগৰ প্ৰতিভাক সন্মান জনাই ভাষণৰ শেষত তেওঁ কয়, "এতিয়াও বলীউড জীয়াই আছে কাৰণ বাঙালী আছে।’’
Continue Reading
