ডিজিটেল ডেস্কঃ নতুন দিল্লীত অনুষ্ঠিত হ’বলগীয়া নীতি আয়োগৰ বৈঠক বৰ্জন কৰাৰ মুখ্যমন্ত্ৰীসকলক তালিকা দীঘলীয়া হৈ গৈ আছে।মমতা বেনাৰ্জী, অৱবিন্দ কেজৰিৱাল আৰু ভগৱন্ত মানৰ পিছত এইবাৰ নীতিশ কুমাৰ , কে চন্দ্ৰশেখৰ ৰাও, এম.কে. ষ্টালিন, পিনাৰাই বিজয়ন, অশোক গেহলটেও বৈঠক বৰ্জন কৰাৰ সিদ্ধান্ত লৈছে বুলি জানিব পৰা গৈছে।
ৰাজনৈতিক বিশ্লেষক একাংশই এই প্ৰৱণতাক মোদী চৰকাৰৰ বিতৰ্কিত সিদ্ধান্তসমূহৰ বিৰুদ্ধে বিৰোধীৰ ঐক্যবদ্ধ প্ৰতিবাদৰ পৰিচায়ক বুলি উল্লেখ কৰিছে। মুখ্যমন্ত্ৰী মমতা বেনাৰ্জীয়ে শনিবাৰে নতুন দিল্লীত নীতি আয়োগৰ বৈঠকত উপস্থিত নাথাকে বুলি ইতিমধ্যে ঘোষণা কৰিছে। তেওঁ ১৫ মে'ত নাবান্নাত এখন সংবাদমেলত এইকথা কৈছিল।মুখ্যমন্ত্ৰী মমতাই নীতি আয়োগৰ বৈঠকক লৈ অসন্তুষ্টি প্ৰকাশ কৰিছিল। অৱশ্যে প্ৰাৰম্ভিক খবৰ অনুসৰি পশ্চিমবংগ চৰকাৰৰ কোনো এজন মন্ত্ৰী বা শীৰ্ষ আমোলা ৰাজ্য প্ৰশাসনৰ প্ৰতিনিধি হিচাপে বৈঠকত উপস্থিত থাকিব পাৰে।
ইপিনে আম আদমী পাৰ্টিয়ে (আপ)শাসন কৰা দুখন ৰাজ্যৰ দুজন মুখ্যমন্ত্ৰী ক্ৰমে দিল্লীৰ অৰবিন্দ কেজৰিৱাল আৰু পঞ্জাৱৰ ভগৱন্ত মানেও নীতি আয়োগৰ বৈঠক "বৰ্জন" কৰাৰ কথা ঘোষণা কৰিছে। কেজৰিৱালে এই সন্দৰ্ভত প্ৰধানমন্ত্ৰী মোদীলৈ এখন পত্ৰও লিখিছে। শনিবাৰে পুৱা বিহাৰৰ মুখ্যমন্ত্ৰী তথা জেডি(ইউ)ৰ নেতা নীতিশ কুমাৰ, তেলেংগানাৰ মুখ্যমন্ত্ৰী তথা ভাৰত ৰাষ্ট্ৰ সমিতিৰ (বিআৰএছ) মুৰব্বী চন্দ্ৰশেখৰ আৰু তামিলনাডুৰ শাসনাধিষ্ঠ ডিএমকেৰ মুখ্যমন্ত্ৰী এম কে ষ্টালিনেও একে পথ অনুসৰণ কৰাৰ কথা ঘোষণা কৰে।
কেৰালাৰ মুখ্যমন্ত্ৰী পিনাৰাই বিজয়ন আৰু ৰাজস্থান কংগ্ৰেছৰ মুখ্যমন্ত্ৰী অশোক গেহলটেও দিল্লীত বৈঠকত উপস্থিত নাথাকিব বুলি জানিব পৰা গৈছে। অৱশ্যে বিজয়নে "আন কাৰ্য্যসূচী"থকাৰ বাবেই বৈঠকত উপস্থিত নাথাকে বুলি কাৰণ উল্লেখ কৰিছে। গেহলটে 'শাৰীৰিক অসুস্থতা 'ৰ কাৰণ দৰ্শাইছে ।কমেও আঠখন অ-বিজেপি শাসিত ৰাজ্যৰ মুখ্যমন্ত্ৰীৰ সিদ্ধান্তই কেন্দ্ৰৰ অস্বস্তি বৃদ্ধি কৰিছে বুলি ধাৰণা কৰা হৈছে।
Continue Reading
